Ödənişsiz parkinqlərdən kimlər istifadə edə bilər? - AYNA CAVABLADI

“Yaşadığım binanın həyətindəki parkinqdən istifadə etməyimə icazə verilmir”. Avtosfer.az xəbər verir ki, bu barədə Lent.az-a daxil olan şikayətdə bildirilib. Vətəndaş qeyd edir ki, o, məcburi köçkündür və hazırda paytaxtda yaşayır. Bu yaxınlarda yaşadığı binanın həyətində yerləşən imtiyazlı parkinqdən istifadə etmək istəsə də, ona icazə verilməyib. Bildirilib ki, “müvəqqəti yaşayış yeri olanlar parklanma ərazisindən istifadə edə bilməzlər”.

Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, təşkil edilmiş parklanma yerindən hər iki istiqamətdə yolun hər iki kənarı boyu 100 metr məsafədə yerləşən ev və ya binalarda qeydiyyatı olan sakinlər fərdi parklanma talonu alaraq avtomobillərini onlar üçün ayrılan yerdə ödənişsiz saxlaya bilərlər:

“Eyni zamanda, bu imkanlardan yararlanmaq üçün xarici vətəndaşlar da müvəqqəti qeydiyyat ünvanı üzrə müraciət etmək hüququna malikdirlər. Qanunvericiliyə əsasən, digər hallarda imtiyazlar nəzərdə tutulmayıb”.