“Paşinyan cinayət törədib ört-basdır etməyə çalışır" – POLİTOLOQ NİKOLUN TAKTİKİ BƏYANATINDAN DANIŞDI

Nikol Paşinyan Ermənistanın İctimai Televiziyasındakı çıxışında ictimaiyyətin gülüş hədəfinə çevrilən açıqlama verib.

Avtosfer.az xəbər verir ki, həm regionda, həm də beynəlxalq arenada müxtəlif vaxtlarda gülünc çıxışları ilə gündəmə gələn Paşinyan bu dəfə hədəfi məlum olmayan açıqlaması ilə yenə də diqqət toplayıb.

Belə ki, ötən həftə Qarabağdakı seperatçı qurumun rəhbəri olan Arayik Arutyunyanın  çıxışından sonra Paşinyan məqsədi müəmmalı olan çıxışında deyib: "Əlimizdəki kəşfiyyat məlumatlarına görə, Bakıda məhkəməsi gedən erməni əsirlərə qadağan olunmuş psixotrop maddələr verilir..."

Ermənistanın baş nazirinin dedikləri ilə bağlı saytımıza açıqlamasında keçmiş xarici işlər naziri, politoloq Tofiq Zülfüqarov deyib ki, ölkəmizdə mühakimə edilən adamları seperatçı liderlər kimi təqdim edirlər. əslində bu adamlar seperatçı deyil:

“Onlar Ermənistanın tabeliyində olan, eləcə də Ermənistan büdcəsindən maliyyələşən işğalçı administrasiyadır. Lakin indi Arayik Arutyunyan deyir ki, onu 44 günlük müharibədə Gəncə və Bərdənin mülki əhalisini bombardıman etməkdə ittiham edirlər. Bu, birbaşa müharibə qanunlarının pozuntusudur, cinayətdir. Arayik də deyir ki, o, əmri özbaşına verməyib, ona bu göstəriş Ermənsitandan gəlib. Ermənsitanda da bu göstərişi kim verə bilər? Baş nazir. Çünki bu postda əyləşən adam həm də Ermənistan silahlı qüvvələrinin komandanıdır və bütün əmrləri də o verir. Nikol Paşinyan da açıqlama verib ki, mühakimə edilən şəxslərin dediklərinə inanmayın, onlar psixotrop maddələrin təsiri altında bunu deyir. Paşinyanın məqsədi öz cinayətini ört-basdır etməkdir. Çünki Paşinyan bilir ki, mühakimə edilən şəxslərin dedikləri ətrafında məsələlər tam dəqiqləşdiyi zaman digər cinayətkarlar barədə də qərar çıxara bilərik. Əslində məsələ çox ciddidir, əvvəlcə Ermənistanın faşist ideologiyası ittiham olunmalıdır”.

Tofiq Zülfüqarov əlavə edib ki, bu, sonuncu bəyanat deyil. Paşinyandan sonra məhkəmədə kimlərin adı çəkiləcəksə, hamısı bu cür bəyanatlar verib mühakimə edilənlərin təsir və təzyiq altında danışdığını deyəcəklər:

“Ermənistan indiki halda bizə qarşı bütün vasitələrdən istifadə etməyə çalışacaq. İstər havadarlarından, istərsə də erməni diasporasından ciddi dəstək gözləyəcək. Ermənistanın bizə qarşı işğalçılıq siyasəti təkcə torpaqlarımızla bağlı planlar çərçivəsində deyildi, istər iqtisadi, istər təbliğat və ideologiya istiqamətində gördükləri işlərin nəticəsində baş vermişdi. Hələ də biz Ermənistanın törətdiyi istər işğalçılıq siyasəti, istərsə də terror nəticəsində vurduğu iqtisadi zərərlərlə mübarizə aparırıq”.

Səfər