"Qanlı göl”də vətəndaşlara qənim kəsilən dəstənin YENİ CİNAYƏTLƏRİ

Yasamal RPİ-nin 28-ci Polis Bölməsinin əməkdaşları tərəfindən quldurluq etdiklərinə görə tutulmuş A.Musayevin, A.Məmmədovun, N.Rəhimlinin və S.Ovçiyevin ətraflarında aparılan əməliyyat tədbirləri ilə onların noyabrın 14-dən 18-dək olan müddətdə “Qanlı Göl” adlanan ərazidə Bakı şəhər sakinləri Q.Nuriyevə, İ.İsmayılzadəyə, E.Hüseynova və Ordubad rayon sakini E.Əsgərliyə zor tətbiq edərək pul, qolbaq, qulaqcıq, gümüş boyunbağı almaları da müəyyən edilib.

Qeyd edək ki, Yasamal Rayon Polis İdarəsinin 28-ci Polis Bölməsinə noyabrın 25-də “Qanlı göl” adlanan yaşayış sahəsində üç nəfərin Bakı şəhər sakini X.Dadaşovu döyməsi, baş nahiyəsinə butulka ilə vuraraq pulunu, mobil telefonunu və ayaqqabılarını alması barədə məlumat daxil olub.

Əlavə olaraq, noyabrın 26-da isə həmin yaşayış sahəsinin yaxınlığındakı meşə ərazisində dörd nəfərin bir əcnəbi vətəndaşı döyərək 100 manat pulunu və 1 500 manat dəyərində mobil telefonunu alması barədə məlumatlar daxil olub.   

Polis əməkdaşlarının keçirdikləri əməliyyat-axtarış tədbirləri nəticəsində quldurluq əməlini törətməkdə şübhəli bilinən Ucar rayon sakini A.Musayev, Yevlax rayon sakinləri A.Məmmədov, N.Rəhimli və Balakən rayon sakini S.Ovçiyev müəyyən edilərək saxlanılıb.

Ətraflarında aparılmış tədbirlərlə onların noyabrın 13-də Abşeron rayon sakini S.Xanlarovu, Bakı şəhər sakinləri A.Əzimovu və V.Nuriyevi döyüb onlardan quldurluq yolu ilə pul, gümüş boyunbağı, qolbaq, saat, mobil telefon, qulaqlıq və eynək almaları da müəyyən edilib.