Sıxılmış qaz daşıyan avtosisterni partladı; 9 ölü, 112 yaralı - VİDEOlar

Çinin Çjeçzyan əyalətində sıxılmış qaz daşıyan avtosisternin partlaması nəticəsində 9 nəfər ölüb, 112-si isə xəsarət alıb. Avtosfer.az xəbər verir ki, insident iyunun 13-də G15 “Shenyang Haikou” sürət avtomagistralının Tayçjou şəhəri ərazisindən keçən hissəsində qeydə alınıb. Bu barədə “Sina” portalı məlumat yayıb.

Məlumata görə, partlayış o qədər şiddətli olub ki, avtosisterninin parçaları ətrafa saçılıb, yaxınlıqda yerləşən binalar dağılıb, şosedə və yaşayış məntəqəsindəki avtomobillər yanıb. Xeyli sayda insan isə dağıntılar altında qalıb.

Hazırda hadisə yerinə 450 yanğınsöndürən, 6 axtarış iti, xilasedicilər, həkimlər və polis əməkdaşları cəlb edilib.

Əməliyyat-xilasetmə işləri davam etdirilir.

Namiq Musayev