Bakıda avtoritetə SİLAHLI HÜCUM: kimin qisasını alırdılar? - TƏFƏRRÜATLAR

CİNAYƏT İŞİ

Qısa arayış...

2023-cü il martın 10-u saat 15 radələrində Bakının Nəsimi rayonu Səməd Vurğun küçəsi, 70 ünvanında naməlum şəxslər odlu silahdan atəş açaraq kriminal aləmdə “Nicat Lənkəranski” ləqəbi ilə tanınan Nicat Əkbərovu öldürmək istəyiblər. Lakin güllələr təsadüfən həmin ərazidə olan Fəqan Rəhimliyə və Tamerlan Hüseynova dəyib. Bu barədə 21-ci Polis Bölməsindən Nəsimi rayon prokurorluğuna məlumat daxil olub. 
Daxil olan məlumatlar əlaqədar polis və prokurorluq əməkdaşları əməliyyat-istintaq tədbirlərinə başlayıblar. Həmin ərazidə, müxtəlif yerlərdən 3 ədəd giliz tapılıb. “VAZ-21099” markalı avtomobilin ön hissəsində 1 ədəd dəlik olması müəyyən edilib. Bakı Dövlət Sirki istiqamətində hərəkət edərkən yerdə topa şəklində qan ləkələri, yolun hərəkət hissəsinin sağ tərəfində “Hyundai Elantra” markalı avtomobilin qarşısında üzərində qanabənzər ləkə olan salfet aşkar olunub. Nəsimi rayon Polis İdarəsinin əməliyyatçıları şübhəli şəxslərin hadisə yerindən “Hyundai Elantra” markalı avtomobillə uzaqlaşdıqlarını və maşını Bakıxanov küçəsi ilə Azadlıq prospektinin kəsişməsində qoyub qaçdıqlarını bildiriblər.

Həmin gün keçirilmiş təxirəsalınmaz əməliyyat-axtarış tədbirləri nəticəsində Heydər Əliyev adına Beynəlxalq Hava limanında şübhəli şəxs qismində 1995-ci il təvəllüdlü Şahmar İsmayılov və 1998-ci il təvəllüdlü Vüqar Quliyev tutulublar.

 
Faktla bağlı rayon prokurorluğunda Cinayət Məcəlləsinin 29,120.2.1-ci (qrup halında qəsdən adam öldürməyə cəhd) maddəsi ilə başlanılan cinayət işi istintaqın davam etdirilməsindən ötrü Baş Prokurorluğunun İstintaq idarəsinə göndərilib.
Şahmar İsmayılova məxsus mobil telefonda, profil şəklinin altında “Zindan və Ölüm bizim üçün son deyil” cümləsi yazılıb. “Whatsapp” tətbiqində yalnız bir mesaj olması müəyyən edilib. Belə ki, “Rovsen Emin” adı ilə qeyd olunmuş profildən Şahmar İsmayılova martın 10-u saat 16:46-da “Ucduz” sözü yazılmış ismarıc göndərilib, lakin həmin mesaj oxunmayıb. Zəng bölməsinə nəzər yetirdikdə müəyyən olunub ki, Şahmar İsmayılov “Vuqar Moskva”, “Emin Naxcvan” və “Rovsen Emin” adları qeyd olunmuş şəxslərlə mütəmadı əlaqə saxlayaraq, danışıqlar aparıb.
Həmçinin Şahmarla Vüqara bu işdə kömək etməli olan 1982-ci il təvəllüdlü Naxçıvan Muxtar Respublikası sakini Ramal Məmmədov da mayın 5-də Baş Mütəşəkkil Cinayətkarlıqla Mübarizə idarəsinin əməkdaşları tərəfindən Novxanı qəsəbəsində, Ş.Qurbanov küçəsi, 15 ünvanında saxlanılıb. İdarədə şəxsi axtarış zamanı, onun üzərindən 19 qramdan artıq psixotrop maddə - metamfetamin aşkar edilib. O, 2013-cü ildə Cinayət Məcəlləsinin 180-ci (soyğunçuluq) maddəsi ilə məhkum olunub.

Avtosfer.az xəbər verir ki,  Lent.az cinayət hadisəsinin istintaq materiallarını əldə edib.
İstintaqla müəyyən edilib ki, Şahmar İsmayılov “WhatsApp” mobil tətbiqi vasitəsi ilə Azərbaycandan kənarda olan Emin Qasımovla 2023-cü ilin fevral-mart aylarında danışıb. Bu zaman, Emin qardaşının 2022-ci ilin oktyabr ayında Türkiyənin İstanbul şəhərində Nicat Əkbərov tərəfindən öldürüldüyünü və hazırda Nicatın Bakıda yaşamasını bildirib. Həmin şəxsi öldürəcəyi təqdirdə Şahmara maddi dəstək olacağına, öz himayəsi altına alacağına, hadisədən sonra xarici ölkələrin birində yaşamasını təmin edəcəyi vədlərini verib. Həmçinin cinayətin törədilməsində həmyerlisi Ramal Məmmədovun ona köməklik edəcəyini bildirib. Martın 6-da Şahmar İsmayılov Naxçıvan-Bakı aviareysi ilə Bakı şəhərinə gələndə, dostu və həməyerlisi Vüqar Quliyev onu qarşılayıb. Quliyevin idarə etdiyi “Hyundai Accent” markalı avtomobillə Nərimanov rayonu, Əliəşrəf Əlizadə küçəsinə, Nicat Əkbərovun yaşadığı evin yaxınlığına gəliblər. Orda o, həmin maşından çıxıb, Ramal Məmmədovun kənarda saxladığı “Hyundai Elantra” markalı avtomobildə əyləşib. Söhbət zamanı Ramal Nicat Əkbərovun idmanla məşğul olduğu yeri, idarə etdiyi zirehli avtomobilin şəklini, əyləşdikləri nəqliyyat vasitəsini kirayə götürdüyünü söyləyərək, “Ruger” modelli tapançanı Şahmara göstərib. Sifarişçi ilkin olaraq Şahmar İsmayılov və Vüqar Quliyevin bank kartlarına qətlin icrası üçün 950 manat pul göndərib. Martın 6-dan 7-nə keçən gecə Şahmar və Vüqar Xətai prospekti, 39 ünvanında yerləşən hoteldə qalıblar.

Ayın 8-i gecə saat 3 radələrində Böyükşor şossesində Şahmar İsmayılov pəncərəni endirib havaya bir dəfə atəş açmaqla tapançanın yararlı olduğuna əmin olub. Martın 10-da Əliəşrəf Əlizadə küçəsinə gedərək, Nicat Əkbərovun yaşadığı evdən çıxmasını gözləyiblər. Bir müddətdən sonra Əkbərov çıxıb, özünə məxsus “Toyota Land Cruiser” markalı avtomobillə Səməd Vurğun küçəsi 70 ünvanında yerləşən idman zalına gəlib. Şahmar və dostları onun arxasınca hərəkət edərək həmin küçədə yerləşən kafenin yanında dayanıb, özlərinə əlverişli yer seçiblər və Nicatın zaldan çıxmasını gözləyiblər. Saat 14:24-də Nicat Əkbərov idman zalından çıxıb yolun kənarında saxladığı maşınına yaxınlaşarkən Şahmar İsmayılov Vüqar Quliyevdən bir qədər irəli keçərək gödəkçəsindən tapançanı çıxarıb və zərərçəkmişin istiqamətində 3-4 dəfə ardıcıl atəşlər açıb. Nicat Əkbərov atəşlərdən yayınıb hadisə yerindən uzaqlaşsa da, həmin küçə ilə piyada hərəkət edən Fəqan Rəhimli və yolun əks istiqamətində “Hundai Elantra” markalı avtomobildə, sükan arxasında əyləşmiş Tamerlan Hüseynov yaralanıblar. Daha sonra Şahmar İsmayılov və Vüqar Quliyev həmin ərazidən uzaqlaşaraq, təhlükəsizlik kameralarında düşməmək və ölkəni dərhal tərk etmək məqsədi ilə Bakıxanov küçəsi ilə Azadlıq prospektinin kəsişməsində avtomobili saxlayıblar. Taksi ilə hava limanı istiqamətində hərəkətlərini davam etdiriblər. Yolda Şahmar İsmayılov Emin Qasımovla əlaqə saxlayıb Nicat Əkbərovu öldürdüklərini və aviabilet almaqdan ötrü, təcili bank kartına pul göndərməsini bildirib. Saat 14:45-də Vüqar Quliyevin adına olan bank kart hesabına, istintaqa məlum olmayan şəxs tərəfindən 2550 manat pul daxil olub. Hava Limanına çatıb, Bakı-İstanbul reysinə biletlər alıblar. Ölkəni tərk etmək istəyərkən, keçirilmiş istintaq-əməliyyat tədbirləri nəticəsində Şahmar İsmayılov və Vüqar Quliyev saxlanılıblar. Onların tutulduğunu bilən Ramal Məmmədov bir müddət istintaqdan gizlənməyə nail olub.

İş üzrə dindirilmiş Şahmar İsmayılov bildirib ki, Vüqar Quliyev onun uşaqlıq dostudur. Naxçıvan Beynəlxalq Hava Limanında fövqəladə hallar üzrə növbə rəisi işləyib, aylıq 800 manat əmək haqqı alıb:

“2022-ci ilin mart ayında Günay Məmmədova ilə ailə həyatı qurmuşam. Kirvəm Əşrəf Qasımovun oğlu, “Qardaşoğlu” ləqəbi ilə tanınan Elnur Qasımov 2022-ci ilin oktyabr ayında Türkiyənin İstanbul şəhərində, yaşadığı evin qarşısında naməlum 2 nəfər tərəfindən öldürülüb. Elnurun “Emin Naxçıvanski” ləqəbi ilə tanınan qardaşı Emin Qasımov hadisədən 8-9 ay əvvəl bilmədiyim cinayət əməlinə görə Fransada həbs edilib. 2013-cü ildə Ukraynanın Xarkov şəhərində yaşadığım dövrdə Eminlə aramızda yaxın dostluq münasibəti yaranıb. 2014-cü ildə Emin ordan gedəndən sonra, onu bir daha görmədim. Lakin arabir onunla “Instagram” şəbəkəsində və “Whatsapp” mobil tətbiqi ilə əlaqə saxlamışıq. Elnur Qasımovun ölümündə Nicat Əkbərovun rolunun olmasını sosial şəbəkələr və başqa platformalarda yayılmış məlumatlardan öyrənmişəm. Hadisədən təxminən 2-3 həftə əvvəl öz ərizəm əsasında işdən azad olunmuşam, əməkhaqqı almaq üçün istifadə etdiyi bank kartım martın 6-da bloklanıb. Həmin gün arvadımla Naxçıvandan Bakıya gəlmişik. Nicatı öldürdükdən sonra Azərbaycanı tərk etməli olduğumdan, tək qalmasın deyə yoldaşımı qayınanamın evinə apardım. Arvadıma işləmək məqsədi ilə İstanbula gedəcəyimi dedim. Yoldaşımın planlarım barədə məlumatı yox idi.

Şahmar İsmayılov

Nicat Əkbərovun qətlə yetirilməsi sifarişini bilavasitə Emin Qasımovdan almışam. Nicatı hansı qaydada və hansı şəraitdə öldürəcəyimi özüm qərar verdim. Bununla bağlı ancaq Vüqar Quliyevlə məsləhətləşmişəm, başqa heç kimə məlumat verməmişəm. Nicatın yaşadığı ünvanı mənə Ramal göstərib. Hava limanında olanda dostum Vüqar məni qarşılayaraq, otelə apardı. Vüqar maddi ehtiyaclarını qarşılamaq üçün özünə məxsus avtomobillə Bakıda fərdi qaydada taksi fəaliyyəti ilə məşğul olurdu. Emin Ramalın nömrəsini göndərərək, Ramalın mənə avtomobil təşkil edəcəyini bildirmişdi. Ramalla görüşəndə Vüqar öz avtomobilinin içərisində əyləşdi, yanımıza gəlmədi. Ayın 7-dən Nicat Əkbərovu izləməyə başladıq. Martın 8-nə keçən gecə bizə verilmiş tapançanı yoxlamaq üçün boş əraziyə gəldik. Bakını tanımadığımdan həmin yerin hara olduğunu bilmədim. Avtomobildə əyləşmiş vəziyyətdə, silahdan bir dəfə havaya atəş açdım.

Ayın 10-u saat 12 radələrində Nicat yaşadığı evdən çıxaraq, avtomobili ilə idman zalına yollandı. Bir qədər irəlidə dayandıq. Vüqarla birlikdə avtomobildən düşərək, tapançanı hazır vəziyyətdə çiynimdə olan qara rəngli çantaya qoydum və dostumla həmin binaya doğru getdik. İdman zalının yanında dayanıb, təxminən 2 saat Əkbərovun çıxmasını gözlədik. Vüqar üzünə tibbi maska keçirmişdi. Günorta Nicat zaldan çıxıb, avtomobili istiqamətində getməyə başladı. Arxasınca gedə-gedə, tapançanı çantadan çıxartdım. Atəş açmamışdan əvvəl Nicatın adını çəkərək, onu çağırdım. Nicat mənə tərəf baxandan sonra, 3 və ya 4 dəfə atəş açdım. Daha sonra Vüqarla birlikdə maşınımıza doğru qaçıb hadisə yerindən uzaqlaşdıq. Bir qədər getdikdən sonra maşını yolun kənarında saxlayıb çıxdıq. Taksi ilə Hava Limanına getdik. Nicatı vurmağımız barədə Eminə məlumat verdim və Vüqara məxsus bank kartının fotoşəklini göndərərək təcili pul köçürməsini dedim. Emin Vüqarın kart hesabına 2500 manat pul köçürdü. Əvvəlcədən razılaşdığımız kimi İstanbul şəhərinə 2 ədəd aviabilet alıb təyyarəyə əyləşdik. 2-ci dəfə Eminlə danışan vaxt, təyyarənin içərisində olduğumuzu və narahat olmamasını dedim. Bu zaman polis əməkdaşları içəri daxil olaraq, bizi saxladılar”.

Ramal Məmmədov bildirib ki, martın 10-da Novxanı qəsəbəsində olanda Emin Qasımov ona zəng edib, Şahmar İsmayılovun tapança ilə Nicat Əkbərovu vurduğunu, lakin öldürə bilmədiyini bildirib:

“Evdən çıxıb hava limanına gedərkən, Emin yenidən mənimlə əlaqə saxlayıb təcili geri qayıtmağımı və orda tutulacağımı dedi. Bundan sonra Emin bir də mənimlə əlaqə saxlamadı. Maraqlananda, Fransa Respublikasında həbsdə saxlanıldığı müəssisədə mobil telefondan istifadə etdiyi üçün onun cəzalandırıldığını eşitdim. Bundan 2 ay sonra mayın 5-də Novxanıda saxlanılaraq, əvvəl Bakı Baş Polis İdarəsinə, sonra isə Baş Mütəşəkkil Cinayətkarlıqla Mübarizə İdarəsinə aparıldım”.

Ramal Məmmədov

Zərərçəkmiş qismində dindirilmiş Nicat Əkbərov bildirib ki, Lənkəran rayonunda anadan olub. Bizneslə məşğul olduğundan tez-tez Türkiyə Respublikasına gedib-gəlib:

“2007-ci ildə boks üzrə Azərbaycan, sonra isə Asiya çempionu olmuşam. Dünya kuboku uğrunda yarışlarda iştirak etmişəm. “Rövşən Lənkəranski” ləqəbli Rövşən Canıyevlə aramızda yaxın dostluq münasibəti vardı. Lakin hər hansı cinayətin törədilməsində iştirak etməmişəm, yalnız 2009-cu ildə xuliqanlıq əməlinə görə 6 ay müddətində azadlıqdan məhrum olunmuşam. Elnur Qasımov və qardaşı Emini 20 ildən çox tanımağıma baxmayaraq, onlarla ədavətim olmayıb. 2022-ci il oktyabr ayında ailəmlə birlikdə Birləşmiş Ərəb Əmirliklərinin Dubay şəhərində olanda, Elnur Qasımovun İstanbulda öldürüldüyünü eşitdim. Elnurun kimlər tərəfindən və hansı səbəbə görə qətlə yetirilməsini bilmirəm. Eşitdiyimə görə, onu öldürən şəxslər Türkiyə polisi tərəfindən həbs ediliblər. 2023-cü il yanvar ayından Bakıda yaşamağa başlamışam. Matın 10-da Seymur adlı sürücümün idarə etdiyi avtomobillə fitness zalına gedərək, təxminən 2 saat idmanla məşğul oldum. Binadan çıxıb, avtomobilimə doğru gedərkən, məndən 6-7 metr aralıda dayanan, başında papaq olan bir nəfərin əlindəki tapançanı mənə tuşladığını gördüm. Dərhal avtomobilimin arxa tərəfinə keçdiyimdən, açılan atəşlərdən yayındım. Atəş açan şəxsi ilk dəfə idi görürdüm”.

Nicat Əkbərov
 
Daxili İşlər Nazirliyindən göndərilmiş məktubda göstərilib ki, hazırda Fransa Respublikasında cəza çəkən 1994-cü il təvəllüdlü Emin Qasımovun qardaşı Səbuhi Qasımovun 2020-ci ilin iyun ayında kriminal aləmdə “Lotu Quli” ləqəbi ilə tanınmış Nadir Səlifovun bacısı oğlu Məhəmməd Qurbanovu bıçaqlaması, 2022-ci ilin iyul ayında İstanbul şəhərində onun digər qardaşı Elnur Qasımovun öldürülməsi faktları ilə bağlı Türkiyə Respublikasında cinayət işlərinin başlanılması və hazırda istintaq aparılması müəyyən edilib. Məlumata əsasən, Emin Qasımov tanışları Mehrac Zərbəliyev, Rövşən Qocayev və Xəyyam Haqverdiyevlə birlikdə 2021-ci il martın 14-də Fransa Respublikasının Nant şəhərində bir nəfərə bıçaqla ağır xəsarətlər yetirib, hadisə yerindən qaçıblar. Həmin şəxs sağ qaldığından, onu qətlə yetirmək məqsədilə 2022-ci il martın 17-də Emin Qasımov, Sumqayıt şəhər sakini Tural Məmmədli və Bakı şəhər sakini Seymur Eyvazovla birlikdə yenidən Fransaya gedib. Həmin il iyunun 12-də Emin Qasımov orda həbs edilib. Oktyabrın 13-də Mehrac Zərbəliyev Polşa Respublikasında saxlanılaraq, Fransaya ekstradisiya olunub. Rövşən Qocayev və Tural Məmmədli barəsində Azərbaycanda axtarış elan edilib.

Məhkəmə iclasında Şahmar İsmayılov və Vüqar Quliyev ittihamlar üzrə üzrə özlərini qismən təqsirli biliblər. Ramal Məmmədov isə özünü təqsirli bilməyib.

Son sözündə Şahmar İsmayılov və Vüqar Quliyev hər hansı kriminal qruplaşmanın üzvü olmadığını bildirərək, onlara aşağı həddə cəza təyin edilməsini xahiş ediblər. Zərərçəkmiş Nicat Əkbərov bildirib ki, təqsirləndirilən şəxslərlə barışıb və onlara qarşı şikayəti yoxdur. O, məhkəmədən həmin şəxslərə cəza verilməməsini istəyib. Zərərçəkmiş Tamerlan Hüseynov və Fəqan Rəhimli təqsirləndirilən şəxslərə qanunvericiliyə uyğun olaraq cəza təyin edilməsini xahiş ediblər.

 
Məhkəmə hesab edib ki, Şahmar İsmayılovun, Vüqar Quliyevin və Ramal Məmmədovun əməlləri ibtidai istintaq orqanı tərəfindən Cinayət Məcəlləsinin 29,120.2.1, 29,120.2.4, 29,120.2.5-ci (qrup halında, xüsusi amansızlıqla və sifarişlə qəsdən adam öldürməyə cəhd), 228.2.1-ci (qanunsuz odlu silah əldə  etmə, satma və gəzdirmə, qabaqcadan əlbir olan bir qrup şəxs tərəfindən törədildikdə), 127.2.3-ci (qəsdən sağlamlığa az ağır zərər vurma, xuliqanlıq niyyəti ilə törədildikdə), 128-ci (qəsdən sağlamlığa yüngül zərər vurma) və 234.1-1-ci (satış məqsədi olmadan narkotik vasitələri və ya psixotrop maddələri xeyli miqdarda əldə etmə və ya saxlama) maddələri ilə düzgün tövsif edilib.

Buna görə də onlar həmin maddələrlə təqsirli bilinməli və cəzalandırılmalıdılar. 
Bakı Ağır Cinayətlər Məhkəməsinin hökmü ilə Şahmar İsmayılov 13 il 6 ay, Vüqar Quliyev 12 il 6 ay və Ramal Məmmədov 12 il müddətinə azadlıqdan məhrum olunublar.