Bakıda avtosalonun qarşısındakı səki avtomobillərdən təmizləndi - VİDEO

Xətai rayonu, Babək prospektində "Electric Auto" avtosalonunun qarşısındakı səki avtomobillərdən təmizlənib.

Avtosfer.az xəbər verir ki, bununla bağlı oxu.az-a Bakı Şəhər Dövlət Yol Polisi İdarəsindən məlumat verilib.

Bildirilib ki, Babək prospektində qeyd edilən avtosalonun piyadalar üçün nəzərdə tutulan səkini zəbt etməsi ilə bağlı Xətai Rayon Dövlət Yol Polisi Şöbəsinin əməkdaşları tərəfindən profilaktik tədbir həyata keçirilib:

"Piyada səkisi təmizlənib orada və avtomobillərin qanunsuz park edilməsi halları ilə bağlı inzibati protokollar tərtib edilib".

***

Xətai rayonu, Babək prospektində "Electric Auto" adı altında fəaliyyət göstərən avtosalon səkini zəbt edib.

Belə ki, avtosalona məxsus maşınlar səkinin üzərinə park edilib. Bu isə sakinlərin sərbəst şəkildə hərəkətinə mane olur. Həmçinin onları avtomobil yoluna çıxmağa vadar edir ki, bu da təhlükəsizlik baxımından ciddi risk yaradır.

Sakinlər bununla bağlı narazılıqlarını Baku TV ilə bölüşüblər.

"Hər gün bu ərazidə təhlükəli hadisələr baş verir. Buradan keçmək mümkün deyil", - vətəndaşlardan biri söyləyib.

Digər bir sakin isə qeyd edib: "Maşınlar hərəkət etməyimizə çətinlik yaradır. Yolu keçə, mağazaya gedə bilmirik. Burada vəziyyət gərgindir".

Daha ətraflı videomaterialda: