Bakıda qətldə təqsirləndirilən şəxsə hökm oxunub

Bakıda atasını qətlə yetirməkdə təqsirləndirilən Murad Əmirovun cinayət işi üzrə məhkəmə prosesi keçirilib.

Avtosfer.az APA-ya istinadən xəbər verir ki, bu gün Bakı Ağır Cinayətlər Məhkəməsində hakim Mahirə Kərimovanın sədrliyi ilə keçirilən prosesdə dövlət ittihamçısı çıxış edib. O, M.Əmirovun 18 il müddətinə azadlıqdan məhrum edilməsini təklif edib.

Prosesdə hökm oxunub. Hökmə əsasən, Murad Əmirov 10 il müddətinə azadlıqdan məhrum edilib.

Qeyd edək ki, hadisə bu ilin may ayında paytaxtın Yasamal rayonu, Rahib Tağıyev küçəsində evdə qeydə alınıb.

1992-ci il təvəllüdlü Murad Nizami oğlu Əmirov atası Nizami Əmirovla mübahisə edib. Mübahisə nəticəsində M.Əmirov atasını səkkiz bıçaq zərbəsi ilə qətlə yetirib. M.Əmirov Yasamal Rayon Polis İdarəsinin əməkdaşları tərəfindən şübhəli şəxs qismində saxlanılıb.

Ona Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə yekun ittiham elan olunub.