Başı telefona qarışan piyada yolu istədiyi yerdən keçərək təhlükə yaratdı - VİDEO

Bakı–Quba yolunda qayda pozan piyada avtomobilin kamerasına düşüb.

Avtosfer.az-ın məlumatına görə, hadisə dekabrın 19-da saat 14:02 radələrində qeydə alınıb. Kadrlardan göründüyü kimi, orta yaşlı kişi yolu müəyyən olunmamış yerdən keçərək hərəkətdə olan sürücülər üçün təhlükəli vəziyyət yaradıb. Belə ki, o, yaxınlaşan avtomobillərə məhəl qoymadan hərəkətini davam etdirib və bu da qəza riskini artırıb. Üstəlik, piyada yolu keçərkən mobil telefondan istifadə edib.

Xoşbəxtlikdən, görüntünü qeydə alan avtomobilin sürücüsü piyadanı vaxtında fərq edərək mümkün yol-nəqliyyat hadisəsinin qarşısını alıb.

Qeyd edək ki, yol hərəkəti qaydalarına əsasən, piyadalar yolu yalnız müəyyən olunmuş keçidlərdən keçməli, xüsusilə intensiv hərəkət olan magistral yollarda diqqətli olmalıdırlar. Mobil telefondan istifadə isə diqqətin yayınmasına səbəb olaraq həm piyadanın, həm də sürücülərin həyatını ciddi təhlükə altına qoya bilər.

Nərmin