Bloger ölkənin yerli brendi olan mineral su məhsulunu bu cür təhqir etdi, tənqid olundu - VİDEO

Sosial şəbəkələrdə yayılan görüntülər istifadəçilərin narazılığına səbəb olub.

Avtosfer.az xəbər verir ki, özünü makler kimi tanıdan bir vətəndaş əlində Kəlbəcərdə istehsal olunan və “İstisu” mineral suyu kimi tanınan su butulkasını yerə ataraq, “bu su belə burada soyuyar” ifadəsi ilə satacağı evi tərifləməyə başlayıb. Sözügedən video qısa müddətdə sosial şəbəkələrdə geniş yayılıb və ciddi ictimai rezonans doğurub.

Videodan sonra görüntüləri izləyən sosial şəbəkə istifadəçiləri maklerin bu davranışına qarşı kəskin və mənfi rəylər yazmağa başlayıblar. Rəylərin əksəriyyətində bildirilib ki, Kəlbəcərin “İstisu” mineral suyu təkcə bir məhsul deyil, həm də uzun illər işğal altında qalmış, Vətən müharibəsi zamanı və ondan əvvəl azadlığı uğrunda minlərlə şəhid verilmiş bir bölgənin rəmzidir.

İstifadəçilər qeyd ediblər ki, İstisu zavodu və ümumilikdə Kəlbəcər ərazisində aparılan bərpa və yenidənqurma işləri şəhidlərimizin qanı bahasına mümkün olub. Bu ərazilər tikilib-bərpa edilənə qədər neçə-neçə hərbçi və mülki şəxs həyatını itirib. Məhz bu səbəbdən belə müqəddəs dəyərin reklam və ya primitiv tanıtım məqsədilə istehza obyektinə çevrilməsi yolverilməz hesab edilib. Prezident İlham Əliyevin belə ölkəmizdə keçirilən beynəlxalq tədbirlərdə, eləcə də xarici səfərlər zamanı yanında görmək istədiyi, təqdim etdiyi “İstisu”yun bu formada məsxərəyə qoyulması sosial şəbəkə istifadəçiləri tərəfindən sərt tənqid edilib.

Bəzi rəylərdə isə vurğulanıb ki, sosial mediada tanınan şəxslər, xüsusilə də influenserlər ictimai məsuliyyət daşıyır və işğaldan azad olunmuş ərazilərlə, bu torpaqların simvoluna çevrilmiş məhsullarla bağlı ifadələrində daha həssas və ehtiyatlı olmalıdırlar. İstisu mineral suyunun Kəlbəcərin tarixini, mübarizəsini və şəhidlərin xatirəsini təmsil etdiyi qeyd olunaraq, bu cür yanaşmaların cəmiyyətdə haqlı narazılıq doğurduğu bildirilib.

Eltac Zülfüqaroğlu