Məşhur Luvr muzeyi qarət olundu - FOTO - YENİLƏNİB

Oktyabrın 19-da səhər saatlarında Luvrdan oğurlanmış doqquz zinət əşyasından bəziləri artıq tapılıb.

Avtosfer.az xəbər verir ki, bu barədə "Le Parisien" məlumat yayıb.

Tapılan əşyalar arasında imperator III Napoleonun həyat yoldaşı Yevgeniyanın tacı da var.

Qəzet, həmçinin quldurluqda dörd cinayətkarın da iştirak etdiyini yazıb. Onlardan ikisi fəhlə kimi sarı jilet geyinib, digər ikisi isə muzeyin pəncərəsi altında skuterlərdə gözləyiblər.

Fransanın mədəniyyət naziri Raşida Dati bildirib ki, oğruluq dörd dəqiqə çəkib. Cinayətkarlar tikinti işlərinin aparıldığı Sena sahilindən binaya daxil olublar. Onlar muzeyə daxil olmaq üçün kran maşınından istifadə ediblər. İki oğru pəncərələri sındıraraq, Apollon qalereyasına daxil olub və oradan qiymətli əşyaları oğurlayıblar.

***16:00
Oktyabrın 19-da səhər saatlarında Luvr muzeyində qarət hadisəsi baş verib. Avtosfer.az xəbər verir ki, bu barədə Fransanın mədəniyyət naziri Raşida Dati məlumat verib. “Oğurluq bu gün səhər saatlarında Luvrda baş verib. Mən muzey işçiləri və polislə birlikdə hadisə yerindəyəm. Hazırda araşdırma aparılır”, – nazir bildirib. “Le Parisien” qəzetinin məlumatına görə, bir neçə oğru muzeyin pəncərələrini sındırıb və zinət əşyalarını oğurlayaraq qaça biliblər. Hadisəni törədənlərin silahlı olduğu bildirilir. Luvr rəhbərliyi muzeyi ictimaiyyət üçün bağlayıb.