Narkoman və vərəm xəstəsi avtobus sürür? - FOTO - VİDEO - YENİLƏNİB

"Dəfələrlə məhkumluq həyatı yaşamış, narkotik istifadəçisi kimi müsahibə vermiş şəxs öz ərizəsi ilə işdən azad edilib".

Avtosfer.az xəbər verir ki, bunu Oxu.Az-ın sorğusuna cavab olaraq "Çinar Trans" MMC-nin direktoru İsmayıl Hüseynov deyib.

"2024-cü il, may ayının 7-də işə düzəlmək üçün bizə müraciət edib. Müəyyən təlimlərdən və tibbi müayinədən keçəndən sonra sınaq müddətinə işə buraxılıb. Sosial şəbəkələrdə çəkilən kadrlar həmin vaxt çəkilib. May ayının 24 də öz xahişi ilə sürücü işdən azad edilib", - deyə İ.Hüseynov qeyd edib.

***

12:56

Dəfələrlə məhkumluq həyatı yaşamış, narkotik istifadəçisi kimi müsahibə vermiş şəxs Bakıda marşrut avtobusu sürür.

Avtsfer.az xəbər verir ki, "Batya Vasmoyski" ləqəbi ilə tanınan Bəxtiyar Ağaməmmədovun paytaxt ərazisində 40 saylı müntəzəm marşrut xətti üzrə sürücü kimi çalışması məlum olub.

"Çinar Trans" MMC-nin istismarında olan xətdə çalışan B.Ağaməmmədovun avtobusla təhlükəli manevrlər etməsi, sərnişinlərlə kobud rəftar etməsi, qeyri-adekvat hərəkətləri diqqəti cəlb edib.

"Batya Vasmoyski" kimi tanınan şəxsin keçmişi ilə bağlı video çəkərək "YouTube" kanalında yayımlayan tanınmış bloqer Nail Kəmərli onun narkoman olmaqla yanaşı, təhlükəli yoluxucu xəstəlik daşıyıcısı olduğunu da bildirib:

"Biz həmin vaxt Bəxtiyar Ağaməmmədovu reabilitasiya mərkəzinə yerləşdirdik, müalicəsinə başlanıldı. Bir müddət orada qaldıqdan sonra onun həm də vərəm xəstəsi olması müəyyən edildi və yoluxucu xəstəlik olduğundan izolyasiya məqsədilə vərəm dispanserinə göndərildi. Belə anlaşılır ki, orada da müalicəsini yarımçıq saxlayıb. Biz barəsində film hazırladığımız şəxslərin taleyi və davranışlarını sonradan izləyə bilmirik".

40 saylı marşrut xəttini istismar edən "Çinar Trans" MMC-dən bildirilib ki, mövzu ilə bağlı gün ərzində açıqlama veriləcək.

(qafqazinfo)