Ölkənin ən zəngin iş adamlarından biri ölü tapılıb

Polşa polisi ölkənin ən zəngin iş adamlarından biri - Yeji Kjanovskinin cəsədini aşkarlayıb.

Avtosfer.az "Azərtac"a istinadən xəbər verir ki, bu barədə Krosno şəhərinin polis idarəsi məlumat yayıb.

Məlumata görə, biznesmenin axtarışı gecə yarısı başa çatıb. Cəsədin itkin düşmüş 54 yaşlı iş adamına aid olduğu təsdiqlənib. Ölümün səbəbi hələlik açıqlanmayıb.

İyunun 6-da 54 yaşlı biznesmen evini tərk edərək yoxa çıxmışdı. Onun axtarışına polis, xilasedicilər, itlər və termal görüntü dronu cəlb edilmişdi.

Yeji və qardaşı Adam Avropanın ən böyük ofis mebeli istehsalçılarından biri olan “Yeni üslub” kompaniyasının həmtəsisçiləridir. 2016-cı ildə Yeji Kjanovskiyə qarşı korrupsiya ittihamı irəli sürülsə də, o, heç vaxt məhkəməyə gəlməmişdi.