“QAZ-53”lə qadının üzərindən keçdi - Sürücülük vəsiqəsi yox imiş

Ramana qəsəbəsində baş verən ölümcül qəza ilə bağlı məhkəmə prosesi başa çatıb.

Modern.az-ın əldə etdiyi məlumata görə, hadisə bu ilin may ayında baş verib.

1959-cu il təvəllüdlü sürücü “QAZ-5327” markalı çirkab su maşınını idarə edərkən ehtiyatsızlıqdan hasarın yanında dayanan qadının üzərindən keçib. Qadın aldığı ağır xəsarətlərdən hadisə yerində həyatını itirib.

Məlum olub ki, sürücünün etibarlı sürücülük vəsiqəsi olmayıb. O, illər əvvəl aldığı “C” kateqoriyalı vəsiqənin müddəti bitdiyi halda avtomobili etibarnamə ilə idarə edib.

Məhkəmə onun hərəkətlərini “Yol hərəkəti haqqında” Qanunun pozulması kimi qiymətləndirib. Təqsirləndirilən şəxs özünü günahkar bilib və zərərçəkmişin ailəsi ilə barışıb.

Sürücü 5 il müddətinə həbs edilib və 3 il müddətinə nəqliyyat vasitəsini idarə etmək hüququndan məhrum olunub.