Sərxoş halda məktəbdən oğurluq etdi

Sumqayıt şəhərində fəaliyyət göstərən 25 nömrəli tam orta məktəbdə oğurluq baş verib. Avtosfer.az-ın "Qaynarinfo"ya istinadən məlumatına görə, sinif otağından proyektor, səsgücləndirici və noutbuk oğurlanıb. Məktəbə ümumilikdə 1799 manat ziyan dəyib. Polisə məlumat verildikdən sonra cinayət əməlini törətməkdə şübhəli bilinən R.Bayramov saxlanılıb. Məlum olub ki, o, başqa bir yerdə də oğurluq edib.  R.Bayramova Cinayət Məcəlləsinin 177.2.2 və 177.2.3-cü maddələri ilə ittiham elan olunub və barəsində polisin nəzarəti altına vermə qətimkan tədbiri seçilib. Cinayət işinə Sumqayıt şəhər Məhkəməsində hakim Samir İsmayılovun sədrliyi ilə baxılıb. Məhkəmə zamanı R.Bayramov verilmiş ittiham üzrə özünü təqsirli bilib. O, əməlinin sərxoş olması ilə izah edib. İş üzrə zərərçəkmiş qismində tanınan məktəb direktoru A.Fleydanlı isə oğurlanan əmlakların ona deyil, məktəbə məxsus olduğunu əsas gətiərərək zərərçəkmiş statusuna xitam verilməsini xahiş edib. Məhkəmənin hökmü ilə R.Bayramlıya 2 il 6 ay müddətinə azadlıqdan məhrumetmə cəzası təyin olunub. Onun şübhəli şəxs qismində tutulduğu 2 gün müddət təyin olunmuş cəzadan çıxılıb və üzərində qəti olaraq 2 il 5 ay 28 gün müddətinə azadlıqdan məhrumetmə cəzası saxlanılıb.