Yasamalda dilənçi uşaq sürücülərə təhlükə yaradır - DİN-dən AÇIQLAMA - VİDEO

Paytaxtın Yasaml rayonu A. Salamzadə küçəsində maraqlı görüntülər qeydə alınıb. Belə ki, şəhərin başqa küçələrində də tez-tez rastlaşılan dilənçi uşaqlar həm özləri, həm də  avtomobillər üçün təhlükəli anlar yaşadıb.

Yolun kənarında uşaqla əyləşən xanım isə avtomobildən onları çəkdiklərini görəndə özünün və qucağındakı uşağın üzünü örtməyə çalışıb.

Məsələ ilə əlaqədar Daxili İşlər Nazirliyinin Mətbuat Xidmətinin əməkdaşı polis leytenantı Lumu İsrəfilli sorğumuza cavab olaraq bildirib ki, dilənçilik, avaralıq və tüfeyli həyat tərzi sürən şəxslərin profilaktikası polis tərəfindən daim diqqət mərkəzində saxlanılır.

“Yetkinlik yaşına çatmayan şəxsin valideyni və ya digər yetkinlik yaşına çatmış şəxs tərəfindən dilənçiliyə sövq edilməsi faktları aşkarlandıqda həmin şəxslər barəsində qanunamüvafiq tədbirlər görülür. Şəxslər qeydiyyatda olduğu əraziyə göndərilir və haldan asılı olaraq diləndirilən azyaşlının müvafiq sığınacağa yerləşdirilməsi təmin olunur.

Cari ilin 4 ayı ərzində ölkə üzrə tüfeyli həyat tərzi keçirən 74 nəfər müəyyən edilib. Həyat tərzi, yaşayışı, məşğuliyyəti dilənçilik olan şəxslərin yanında 54 azyaşlı müəyyən olunub ki, hər faktla bağlı polis tərəfindən qanunamüvafiq tədbirlər görülüb”.

Həmin görüntünü sizə təqdim edirik: