Yolu piyadalar üçün nəzərdə tutulmayan yerdən keçən qadını MAŞIN VURDU

Bakının Nizami rayonu ərazisində yol-nəqliyyat hadisəsi zamanı xəsarət alan şəxsin son vəziyyəti açıqlanıb.

Avtosfer.az oxu.az-a istinadən xəbər verir ki, Tibbi Ərazi Bölmələrini İdarəetmə Birliyindən (TƏBİB) verilən məlumata görə, oktyabrın 13-də saat 21:00-da Respublika Təcili və Təxirəsalınmaz Tibbi Yardım Mərkəzinə Nizami rayonu ərazisindən yol-nəqliyyat hadisəsinin baş verməsi səbəbi ilə çağırış daxil olub.

"Dərhal təcili tibbi yardım briqadası çağırış ünvanına cəlb olunub. Təcili tibbi yardım briqadası tərəfindən 1968-ci il təvəllüdlü (qadın cinsli) şəxsə ilkin tibbi xidmət göstərilib və açıq kəllə-beyin travması, üz sümüklərinin sınığı diaqnozu ilə aqonal vəziyyətdə Sabunçu Tibb Mərkəzinə hospitalizasiya olunub", - deyə məlumatda bildirilib.

***

Bakının Nizami rayonu ərazisində yol-nəqliyyat hadisəsi baş verib.

Avtosfer.az oxu.az-a istinadən xəbər verir ki, avtomobil yolu keçən piyadanı vurub.

Ağır vəziyyətdə Sabunçu Tibb Mərkəzinə çatdırılan şəxsin komatoz vəziyyətinə düşdüyü bildirilir.

Bakı Şəhər Dövlət Yol Polisi İdarəsinin cavabında qeyd olunub ki, hadisə ötən gün saat 21 radələrində Rüstəm Rüstəmov küçəsində qeydə alınıb:

"Tural Binnət oğlu Balakişiyev idarə etdiyi KIA markalı, 77-SB-649 dövlət nömrə nişanlı avtomobillə yolu piyadalar üçün nəzərdə tutulmayan hissəsindən keçən piyada 1968-ci il təvəllüdlü Gülər Xəlil qızı Nuralaşı vurub.

Faktı Nizami Rayon Polis İdarəsinin əməkdaşları araşdırır".