Avropada oğruların yeni hədəfi: İşlənmiş bitki yağları

Bəlkə də kiməsə qəribə gələ bilər: Avtomobil saytında qida üçün istifadə edilən yağla bağlı xəbərə nə lüzum?

Amma var, çünki söhbət birbaşa müasir avtomobil yanacağından gedir.  

Avtosfer.az-ın xəbərinə görə, son illərdə Avropada işlənmiş bitki yağlarından ekoloji fəsadı az olan bioloji yanacağın istehsalı (xüsusən də dizel) artıb. Bu yağlar ictimai iaşə obyektlərindən toplanıb emal olunur. Kafe və restoranlar da bu yağları yığıb təhvil verir. 

Qiymət də bahadır. Əgər işlənmiş yağın 1 tonu 2008-ci ildə 150 avro idisə, ötən il qiymət rekord həddə - 2000 avroya çatıb. Hazırda isə qiymət 1000 avrodur. 

Belə bir xammal təbii ki, oğruların diqqətindən yayına bilməz. Böyük restoranlar artıq işlənmiş yağları qorumağa çətinlik çəkir. Buna görə də, müəssisələr ya işlənmiş yağ bidonlarını polad qəfəsə yerləşdirir, ya da zirzəmiyə endirir.

Vüqar