Azərbaycanda hava yolu şirkəti 1 mlrd. manata yaxın xalis mənfəət əldə edib

“Silk Vey Vest Aviaşirkəti” 2022-ci il üzrə audit hesabatlarını açıqlayıb.

Avtosfer.az şirkətin audit hesabatlarına istinadən xəbər verir ki, 2022-ci ildə “Silk Vey Vest Aviaşirkəti”nin xalis mənfəəti 2.1% artaraq 939 milyon 878 min manata bərabər olub. 2021-ci ildə şirkətin xalis mənfəəti 920 milyon 230 min manat olub.

Hesabat dövründə şirkətin ümumi gəlirləri 3 milyard 244.5 milyon manat (illik müqayisədə 11.6% çox), ümumi xərclər isə 2 milyard 17.1 milyon manat (illik müqayisədə 14% çox) təşkil edib. Bu dövrdə şirkətin əməliyyat mənfəəti 1 milyard 227.4 milyon manata bərabər olub ki, bu da illik müqayisədə 7.8% çoxdur.

Ötən il şirkət 235 milyon 363 min manat mənfəət vergisi ödəyib.

2022-ci ildə şirkətin cəmi aktivləri 2021-ci illə müqayisədə 31.2% və ya 636.7 milyon manat artaraq 2 milyard 679,9 milyon manat, cəmi öhdəlikləri isə 12.7% və ya 179.3 milyon manat azalaraq 1 milyard 237.5 milyon manat təşkil edib.

2023-cü il yanvar ayının 1-nə “Silk Vey Vest Aviaşirkəti”nin cəmi kapital 1 milyard 442.3 milyon manata bərabər olub ki, bu da illik müqayisədə 2.3 dəfə və ya 816 milyon manat çoxdur.