Azərbaycanda sərnişin qatarları PANDEMİYAYA görə dayandırılmayıb – Səbəb BƏLLİ OLDU

Yoluxma sayı minimum həddə düşüb. Buna görə də bir sıra qadağalar aradan qaldırılıb. Ölkədə karantin rejiminin olması demək olar ki, hiss edilmir. Amma hansısa bölgəyə getmək zərurəti yarananda karantin qadağaları ortaya çıxır. Bəlli olur ki, 3 ilə yaxındır ki, ölkə daxilində dəmir yolu ilə sərnişindaşıma həyata keçirilmir. Halbuki, bir ildən artıqdır ki, avtobusla və avtomobillə sərnişindaşıma qadağası aradan qaldırılıb. 

Bəs, dəmir yolunda sərnişindaşıma niyə bərpa olunmur?

Məsələ ilə bağlı məlumat almaq üçün “Azərbaycan Dəmir Yolları” QSC ilə əlaqə saxladıq. “Azərbaycan Dəmir Yolları” QSC-dən Bizim.Media-ya bildirildi ki, hazırda ölkədə dəmir yolu nəqliyyatı infrastrukturunda əsaslı təmir işləri aparılır:

“Bir sıra istiqamətlərdə sabit cərəyandan dəyişən cərəyan sisteminə keçid üzrə işlər davam etdirilir, elektrik xətləri, işarəvermə və rabitə sistemləri, o cümlədən stansiyalardakı inzibati binalar, elektrik xətləri təmir edilir. Qeyd olunan kompleks tədbirlər planı tamamlandıqca ölkədaxili sərnişin daşımalarının bərpası növbəli şəkildə gündəmə gələcək”.