Azərbaycan üzərindən tranzit hava daşımaları 1,3 dəfəyədək artıb

Azərbaycan üzərindən keçən marşrut şəbəkəsinin inkişaf etdirilməsi, onların səmərəliliyinin və ekoloji təhlükəsizliyinin artırılması sahəsində “Azəraeronaviqasiya” Hava Hərəkəti İdarəsi (AZANS) tərəfindən görülən daimi işlər nəticəsində ölkə üzərindən tranzit hava daşımalarında artım mövsümi aylarda 2,6 dəfə olmaqla, ümumi orta artım tempi 1,3 dəfəyədək çatıb.

Bunu "Azərbaycan Hava Yolları" QSC-nin vitse-prezidenti Samir Rzayev AZƏRTAC-a müsahibəsində bildirib.

O qeyd edib ki, hazırda ölkənin hava məkanında ay ərzində 12 minə yaxın tranzit uçuş həyata keçirilir: "Bu bir daha göstərir ki, Azərbaycanın hava məkanı xarici aviaşirkətlər üçün daha cəlbedicidir. Eləcə də, Azərbaycan hava hərəkətinin idarə edilməsi və ölkə ərazisindən tranzit uçuşların planlaşdırılması sahəsində EUROCONTROL ilə əməkdaşlığı dinamik şəkildə genişləndirir”.