“Azəriqaz”ın rəhbərliyi “Əsgərə məktub” layihəsinə qoşulub

“Azəriqaz” İstehsalat Birliyinin rəhbərliyi və əməkdaşları “ASAN Könüllüləri” Təşkilatının “Əsgərə məktub” layihəsinə qoşulub.

Avtosfer.az xəbər verir ki, birliyin əməkdaşlarının yazıb Azərbaycan Əsgərinə göndərdiyi məktublarda Silahlı Qüvvələrimizin xilaskar missiyası, uzun illər işğalda qalan torpaqların azad olunmasının necə qürurverici və müqəddəs bir hadisə olduğu qeyd edilib. Yazılan məktublarda hər bir əsgərimizlə, zabitimizlə fəxr olunduğu öz əksini tapıb. Müzəffər, rəşadətli ordumuzun Ali Baş Komandan, cənab İlham Əliyevin rəhbərliyi ilə düşmənə endirdiyi zərbələr nəticəsində tezliklə bütün işğaldan azad olunacaq torpaqlarda üçrəngli bayrağımızın dalğalanacağına əminlik ifadə edilib. “Azəriqaz” İB-nin bütün əməkdaşlarının Azərbaycan Ordusunun ardınca “Yüksələr bayrağımız, isinər ocağımız” devzi ilə irəlilədiyi qeyd edilib.