Bakıda sxem əsasında qoyulmuş, dayanacağı zəbt edən zibil qabları - VİDEO

“Sabunçu rayonunun Zabrat-1 qəsəbəsində sözügedən ünvanda qoyulan zibil konteynerləri artıq uzun illərdir ki, oradadır”.

Bu barədə Sabunçu Mənzil Kommunal və Təsərrüfat Birliyindən məlumat verilib.

Bildirilib ki, zibil konteynerləri illər əvvəl yol kənarında deyil, piyada səkisinin üstündə olub:

“İllər keçdikcə həmin küçə boyunca bir sıra obyektlər tikilib. Zibil konteynerləri də bir qədər irəli çəkilib. Lakin son illərdə əraziyə avtobus dayanacağı ilə bağlı məlumatlandırıcı lövhənin qoyulması bu cür anlaşılmazlıq yaradıb. Zibil konteynerləri illər əvvəl müvafiq sxemlər əsasında ərazilərə yerləşdirilib. Həmin meydançaların yerini dəyişdirmək isə təəssüf ki, mümkün deyil”.

***

Sabunçu rayonu Zabrat-1 qəsəbəsində avtobus dayanacağı yoxdur.

Bu barədə ərazidə yaşayan sakinlər tərəfindən şikayət daxil olub. Sakinlər iddia edirlər ki, avtobuslar gəlib zibil konteynerlərinin yanında saxlayır:

“Ərazidə dayanacaq olduğunu bildirən məlumat lövhəsi var. Lakin sərnişinlərin yağışda, günəşdə dayanmasını nəzərə alıb normal bir dayanacaq qoymayıblar. Qışda yağış, yayda gün başımıza döyə-döyə qalırıq. Onun yerinə məlumatlandırıcı lövhənin altında zibil konteynerləri qoyulub. Avtobus gözləyənə qədər ciyərlərimiz zibil qoxusu ilə dolur. 

Bir qədər irəlidə işıqfor var. İki ya üç avtobus ard-arda dayananda tərpənməyə də yer qalmır. Yolda tıxac olur. Üstəlik yolun bir tərəfindən digər tərəfinə keçmək üçün piyada zolağı var, amma bunu yalnız ərazidə yaşayanlar bilir. Çünki piyada zolağı pozulub. Aidiyyəti qurumlar zolaqların rənglənməsini də təmin etmir. Maşın görmür, sürətlə keçir. Bizim piyada zolağı ilə dayanacaq problemimizi həll edən yoxdur”.

Məsələ ilə bağlı Rəqəmsal İnkişaf və Nəqliyyat Nazirliyinin tabeliyində olan Azərbaycan Yerüstü Nəqliyyat Agentliyindən (AYNA) bildirilib ki, Şəhər Şosesinin Zabrat qəsəbəsindən keçən hissəsində nişanlanma xətlərinin yenilənməsi planda var:

“Qeyd edək ki, sözügedən yol sahəsində bununla bağlı müvafiq tədbirlərin görülməsi iş planına daxil edilib. Məlumat üçün onu da qeyd edək ki, sözügedən ünvanda səki infrastrukturunun vəziyyəti avtobuslar üçün  dayanacaq pavilyonun quraşdırılmasına əlverişli deyil. Bu səbəbdən də həmin hissədə avtobus dayanacaq nişanı qoyulub”. (oxu.az)