Bakının mərkəzində fəaliyyətsiz muzey - FOTO

28 may metro stansiyasından istifadə edənlər yəqin bu tarixi binanı görüb. Şüşə qapının üzərində Bakı Dəmir Yol Muzeyi yazılıb və iş saatları da göstərilib.

Azərbaycan Dəmir Yollarının saytında olan məlumata görə, muzey 9 noyabr 2019-cu il tarixində Prezident İlham Əliyevin iştirakı ilə açılıb. 

Sonradan araya pandemiya düşdü və belə söhbət vardı ki, muzey pandemiyadan sonra açılacaq. Pandemiya artıq geridə qalsa da, açılışdan söhbət  getmir. Bu muzeylə bağlı KİV-də üst-üstə 5 xəbər ancaq tapmaq olar. 

İndi burada 1 məqamı ayırd edə bilmədim: bura ictimaiyyətə qapalı muzeydir, yoxsa açıq?

Dünyanın hər yerində ictimaiyyətə qapalı muzeylər mövcuddur və bu da heç kimdə təəccüb doğurmur. Lakin belə muzeylərdə bir qayda olaraq binanın üzərində müvafiq məlumat yerləşdirilir. Ya da ümumiyyətlə binanın üzərində heç bir məlumat olmur. 

Əgər iş saatları göstərilibsə (10.00-18.30) deməli, ictiamiyyətə qapalılıqdan söhbət gedə bilməz. Bəs onda turizm mövsümünün qızğın  vaxtında, şəhərin əlçatan yerində qərar tutan muzeyin qapılarının bağlı olmasına səbəb nədir?