Deputat: "Bəzi qüvvələr Azərbaycana qarşı hibrid təhdidlər yaratmağa başladılar"

"Prezident İlham Əliyevin rəhbərliyi ilə Azərbaycan öz ərazi bütövlüyünü, suverenliyini tam bərpa edəndən sonra bəzi dairələr Aİ-nin və onun müxtəlif dövlət institutlarının arxasında gizlənərək erməni lobbisinin sifarişləri ilə ərazi bütövlüyümüzə və suverenliyimizə qarşı hibrid təhdidlər etməyə başladılar".

Avtosfer.az xəbər verir ki, bunu Milli Məclisin Xarici müdaxilələrə və hibrid təhdidlərə qarşı müvəqqəti komissiyasının "Cənubi Qafqazda sabitliyə "sülh missiyası" adlı hibrid hücum" mövzusunda keçirdiyi ictimai müzakirədə komissiyanın sədri Ramid Namazov bildirib.

O qeyd edib ki, Aİ və digər ölkələrdə hər hansı bir missiyanın yaradılması üçün hüquqi əsas olaraq iki şərt mövcuddur:

"Ya tərəfdaş ölkənin dəvəti olmalıdır, ya da BMT Təhlükəsizlik Şurasının müvafiq qətnaməsi. Ermənistandakı missiyalara gəldikdə isə biz tamamilə fərqli mənzərə ilə qarşı-qarşıyayıq. Bu günə qədər Avropa İttifaqı Ermənistanda müxtəlif adlar altında üç missiya yaradıb. Bunlardan biri və ya birincisi qismən hüquqi əsaslara söykənsə də, digər ikisi Azərbaycanın razılığı olmadan, ölkəmizin ərazi bütövlüyünə, sərhədlərinin toxunulmazlığına və suverenliyinə təhdid yaradan missiyalar kimi qiymətləndirilə bilər".