Dünyada təyyarə biletləri bahalaşıb

Yay fəslinin yaxınlaşması ilə istirahət planları dəqiqləşir.  Tətilini başqa ölkədə keçirən insanlar əsasən aviasiyaya üstünlük verirlər. Bu da təyyarə qiymətlərində artımı şərtləndirir. Bəzi turizm destinasiyaları üzrə isə indidən bilet qıtlığı yaranıb.  Problemin kökündə  təkcə tələbin artması dayanmır. 

Avtosfer.az-ın xəbərinə görə, dünyada təyyarə biletlərinə tələbat kəskin şəkildə artıb. Əksər şirkətlər koronavirus pandemiyasından əvvəlki müştəri sayını bərpa edib. Turist sayı da 2022-ci illə müqayisədə kifayət qədər çoxdur. Tələbin yüksəlməsi isə qiymət artımı ilə nəticələnir.  Almaniya, İspaniya, Fransa və İtaliya kimi ölkələrdə cari ilin ilk rübündə təyyarə biletləri 20-25% arası bahalaşıb.
Lakin qiymət artımını şərtləndirən yeganə amil tələb-təklif nisbəti eyil. Digər  ciddi amil Rusiya-Ukrayna münaqişəsi nəticəsində kerosinin bahalaşmasıdır. Ötən il kerosin 71% bahalaşıb. Eyni zamanda detalların qiyməti və təmir xərcləri də ciddi şəkildə artıb.

Ekspertlərin qənaətinə görə bahalaşmada təyyarə istehsalçıları da müəyyən rol oynayır. Belə ki, pandemiya dövründə fəaliyyəti zəifləmiş istehsalçılar sifarişləri vaxtında çatdıra bilmir. Digər tərəfdən, pandemiya ilə başlayan xammal qıtlığı bu gün də davam edir. 2020-ci ildə pozulmuş təchizat zənciri tam bərpa eielməyib. Buna görə də, aşağı büdcəli şirkətlər hava gəmisi qıtlığı yaşayır. Problemdən çıxış yolunu isə qiymət artımında görürlər. 
Sərnişinlər isə biletə çox pul ödəməmək üçün onu 5-6 ay əvvəldən alırlar. Almaniya və Fransadan Yunanıstana yay mövsümünə nəzərdə tutulan biletlərin 60%-dən çoxu satılıb. Avropalıların Məğribdə (Şimal-Qərbi Afrika) əsas destinasiyası olan Əlcəzair və Mərakeşə ucuz bilet tapmaq çətinləşib. Bunun səbəbi Şimali Afrika ölkələrinin ötən ay aeroportlardakı sanitar məhdudiyyətləri ləğv etməsidir. Bu səbəbdən, son 3 ildə Qara qitədəki qohumlarını görə bilməyən avropalıların bura axını  başlayıb.