“Emin Əmrullayev milləti təhqir edib, üzr istəməlidir” – Deputat

Milli Məclisin Elm və təhsil komitəsinin üzvü, millət vəkili Etibar Əliyev elm və təhsil naziri Emin Əmrullayevin milləti təhqir etdiyini əsas gətirərək onu Azərbaycan xalqından üzr istəməyə çağırıb.

Avtosfer.az xəbər verir ki, bu barədə deputat özünün sosial şbəkə hesabında yazıb.
“Emin Əmrullayev deyir ki, yaşı 25-dən yuxarı gənc olmayan adamların 60 faizi oxuduğu mətndə əsas fikri başa düşmür. Sonra deyir ki, mən faktı deyirəm. Bu nə deməkdir? Belə fakt olar? Hansı mətni? Ölkənin elm və təhsil naziri milləti təhqir edir. Sən hardan bilirsən ki, 25 yaşdan yuxarı yaşı olanların 60 faizi Füzulinin, Nizaminin, Əhməd bəy Ağaoğlunun, Axundovun, Heminqueyin, Çexovun və s. yazıçı və mütəfəkkirlərin əsərlərindəki əsas fikri başa düşmür? Nazir bu fikrinə görə Azərbaycan xalqından üzr istəməlidir”, –  o bildirib.
Qeyd edək ki, E. Əmrullayev sözügedən fikirləri iyulun 6-da “Sertifikatlaşdırma: peşəkar müəllim-keyfiyyətli təhsil” adlı tədbirdə respublika üzrə sertifikasiya imtahanında yüksək nəticə göstərən müəllimlərlə görüşündə səsləndirib.
“Azərbaycanda 25 yaşdan yuxarı adamların təxminən 60 faizi oxuduğunu başa düşmür, yəni əsas məqsədini anlamır”, – nazir deyib.