İdxal olunan köhnə minik avtomobilləri üçün aksiz dərəcəsi artırılır

Gələn ildən Azərbaycana idxal edilən istehsal tarixi 7 ildən çox olan minik avtomobilləri üçün aksiz dərəcələri artırılacaq. Avtosfer.az xəbər verir ki, bununla bağlı dəyişikliklər Milli Məclisin bu gün keçirilən iclasında müzakirə edilərək Vergi Məcəlləsi və “Dövlət rüsumu haqqında” qanuna təklif olunan dəyişikliklərdə öz əksini tapıb.

Mövcud qanunvericiliyə əsasən, minik avtomobillərinin mühərrik həcminə uyğun olaraq müxtəlif aksiz dərəcələri tətbiq olunur. İstehsal tarixi 7 ildən artıq olan idxal avtomobilləri üçün isə hazırda hesablanmış aksiz məbləğinə benzin mühərrikli avtomobillər üçün 1,2; dizel mühərrikli avtomobillər üçün 1,5 yüksəldici əmsal əlavə edilir.

Təsdiqlənmiş yeni layihəyə görə, 2026-cı il yanvarın 1-dən etibarən bu əmsallar artırılacaq:

Benzin mühərrikli minik avtomobilləri üçün əmsal 1,5,

Dizel mühərrikli minik avtomobilləri üçün isə 2 olacaq.

Müzakirələrdən sonra sənəd üçüncü oxunuşda səsverməyə çıxarılaraq qəbul edilib.