Məhkəmə Taleh Qaraşova sui-qəsd hazırlayan şəxsə bu cəzanı verdi

Lənkəran Şəhər İcra Hakimiyyətinin başçısı Taleh Qaraşova qarşı sui-qəsd hazırlamaqda, terror aktları planlaşdırmaqda və başqa ağır cinayətlərdə ittiham olunan Bəhruz Əskərovun barəsində Dövlət Təhlükəsizliyi Xidmətində (DTX) başlanılmış cinayət işi üzrə məhkəmə araşdırması başa çatıb.

Avtosfer.az xəbər verir ki, Bakı Ağır Cinayətlər Məhkəməsində keçirilən son iclasda hökm oxunub.

Səbuhi Hüseynovun sədrlik etdiyi hakimlər belə qənaətə gəlib ki, təqsirləndirilən şəxsə verilmiş ittihamlar məhkəmə istintaqı ilə təsdiqini tapıb.
Hökmə əsasən, Bəhruz Əskərov 15 il müddətinə azadlıqdan məhrum edilib.

Qeyd edək ki, B.Əskərov DTX tərəfindən toplanmış sübutlar əsasında həbs edilib. Ona qarşı Cinayət Məcəlləsinin 28,120.2.1, 28,120.2.10, 28,120.2.11, 28,120.2.12 (qabaqcadan əlbir olan bir qrup şəxs halında milli, irqi, dini ədavət və düşmənçilik zəminində təkrar adam öldürməyə hazırlıq), 28,214.2.1, 28,214.2.3 (odlu silahdan və silah qismində istifadə olunan predmetlərdən istifadə etməklə terror aktı törətməyə hazırlıq), 28,214-3.1 (terrorçuluqla əlaqədar təlim keçməyə hazırlıq), 28,277 (dövlət xadiminin həyatına sui-qəsd etməyə hazırlıq) və 28,278.1-ci (dövlətin konstitusiya quruluşunun zorla dəyişdirilməsinə yönələn hazırlıq hərəkətləri) maddələri ilə yekun ittiham elan edilib.

Zərərçəkmiş Taleh Qaraşov məhkəməyə gəlməyib. O, nümayəndəsi vasitəsilə göndərdiyi ərizəsində Əskərovdan şikayətçi olduğunu, maddi və mənəvi tələb irəli sürmədiyini bildirib.