Mənzil sahiblərinin nəzərinə - 20 gündən bir cərimələnə bilərsiniz

Yaxın gələcəkdə daşınmaz əmlakın sığortalanması üçün elektron sistem işə düşəcək. Yeni sistem əmlakın sığortalanması prosesini sadələşdirəcək. Eyni zamanda bu sistem vasitəsilə hər hansı əmlakın sığortalanıb-sığortalanmadığını müəyyən etmək olacaq. Sığortası olmayan ev sahibləri isə cərimələnəcək.

Məsələ ilə bağlı Bakupost.az -a açıqlama verən əmlak məsələləri üzrə ekspert Ramil Osmanlı bildirib ki, yeni sistem ilin sonuna qədər tam formalaşacaq.

Onun sözlərinə görə, Daşınmaz Əmlakın Dövlət Reyestri Xidməti və İcbari Sığorta Bürosu arasında informasiya mübadiləsi həyata keçirmək üçün məlumat bazası yaradılacaq: "Nəticədə İcbari Sığorta Bürosu Daşınmaz Əmlakın Dövlət Reyestri Xidmətindən əmlakların sığorta olunub-olunmaması barədə məlumatları əldə edə biləcək. Təbii ki, bu, vaxt tələb edən məsələdir. Lakin bu ilin sonuna kimi proseslərin tam şəkildə qaydasına düşəcəyini hesab edirəm”.

Ekspert sığortasız mənzil sahiblərinin cərimələnəcəyi barədə də danışıb: “İcbari sığorta olunmayan mənzillər üçün cərimə məbləği 40 manatdır. İnzibati Xətalar Məcəlləsinə görə, həmin cərimələr hər 20 gündən sonra ardıcıllıqla yazıla bilər. Belə ki, mənzil sahibi 40 manat cəriməni 20 gün müddətində ödəməsə və əmlakını sığorta etdirməsə, o zaman həmin cərimə 20 gündən bir yazılacaq. Bu məsələ qanunla öz əksini tapıb. Müəyyən texniki məsələlər və informasiya mübadiləsi tam təmin olunana qədər güzəştlər tətbiq edilə bilər. Lakin vətəndaşlar buna arxayın olmamalıdır. Çünki qanunvericiliyin tələbi var”.

R.Osmanlı, bölgələr üzrə icbari sığortanın məbləğini də qeyd edib: “Bakı şəhərində icbari sığorta üçün ödəniləcək məbləğ 25 min, Gəncə, Sumqayıt, Naxçıvan şəhərləri üçün 20 min, digər yaşayaış məntəqələri üçün isə 15 min manat nəzərdə tutulub. Sığorta etdirmək istəyən şəxslər bu məbləğin 0,2 faizini sığorta üçün ödəməlidir. Yəni, Bakı şəhəri üzrə 50, Gəncə, Sumqayıt, Naxçıvan şəhərləri üzrə 40 manat, digər yaşayış məntəqələri üzrə 30 manat ödənilməlidir. Bu ildə bir dəfə ödənilən sığorta növüdür. İl tamam olduqdan sonra proses təkrarlanır. Burada sığorta şirkətləri müştəridən asılı olaraq müəyyən güzəştlər tətbiq edə bilər. Bu, sığorta şirkətlərinin öz işidir. Lakin rəqəmlər qanunvericiliklə müəyyən edilib”.