Polis qadın sürücünü 20 kilometr təqibdən sonra saxlaya bildi

Ötən gün Fransa polisi maraqlı halla qarşılaşıb. 

Avtosfer.az-ın xəbərinə görə, sürət limiti 130 km/saat olan yolda 230 km/saat sürətlə hərəkət edən belçikalı sürücüyə “saxla” əmri verilsə də, o, sürəti daha da artırıb. 5 avtomobildən ibarət jandarm komandası sürücünü 20 km təqib etdikdən sonra sünii tıxacla saxlaya bilib. 

Bahalı “Porsche Cayenne” idarə edən qadın sürətlə getməsini yanacağın tükənməsi ilə izah edib. O bildirib ki, yanacaqdoldurma məntəqəsində kartla ödəniş edə bilmədiyi üçün özünü nağd ödəmə olan yerə çatdırmaq istəyirmiş. Benzin qurtaracağından ehtiyat etdiyi üçün sürətlə gedib.

Əlbəttə ki, polis bu “arqument”ə inanmayıb. Qadının sürücülük vəsiqəsi alınıb, maşını cərimə meydançasına yerləşdirilib. Sürücüyə 750 avro, narkotikdən istifadə edən sərnişinə isə 150 avro cərimə yazılıb. Cərimə yerində ödənilib.

Vüqar Yaşaroğlu