Qayıqda 2,5 ton narkotik və 2 meyit TAPILDI

Kolumbiya Hərbi Dəniz Qüvvələri iki cəsəd və 2,5 tondan çox narkotik maddə daşıyan əldəqayırma sualtı qayığı ələ keçirib. 

Sakit okean dəniz zonasına nəzarət və təhlükəsizliyin təmin edilməsi istiqamətində aparılan əməliyyatlar zamanı yarımdalma tipli sualtı qayıq aşkar edilib. 2643 kiloqram kokain hidroxloridi daşıyan qayıq Mərkəzi Amerikaya gedirmiş.

Hərbçilər sualtı qayıqda həddindən artıq zəif vəziyyətdə olan iki nəfəri görüblər və həbs olunduqdan sonra onlara ilkin tibbi yardım göstəriblər.

İlkin məlumata görə, onlar gəmidə yanacaq sızması nəticəsində yaranan zəhərli qazlardan zəhərləniblər. Bundan əlavə, sualtı qayığın içərisində iki cəsəd tapılıb.

“Saxlanılanların hamısı, eləcə də narkotik vasitələr və ölənlərin cəsədləri Narinyo departamentinin Tumako kəndinə aparılıb və orada aidiyyəti orqanlara təhvil verilib... Hüquq-mühafizə orqanlarının fəaliyyəti sayəsində. 87 milyon dollardan çox vəsaitin narkotik ticarəti ilə məşğul olan təşkilatların xəzinəsinə daxil olmasının qarşısı alınıb”, - Hərbi Dəniz Qüvvələrinin nümayəndəsi vurğulayıb. (lent.az)