Sərxoş oğlan evin açarı ilə maşınları işə salmaq istədi

Rusiyada gənc oğlan mənzilin açarı ilə maşınları oğurlamağa cəhd edib.

Hadisə Kalininqrad vilayətinin Baltiysk şəhərində baş verib. Polis “Mercedes” və “Kia” markalı avtomobilləri oğurlamağa cəhd edən 25 yaşlı oğlanı saxlayıb. Maşını qaçıran şəxs “Mercedes”in qapısı açıq olduğu üçün salona daxil olub. O, yaxınlıqda dayanmış “Kia”nı da işə salmağa çalışıb.

Aparılan əməliyyat-axtarış tədbirləri nəticəsində polis gəncin şəxsiyyətini müəyyənləşdirib. Müstəntiqlərin fikrincə, şübhəli şəxs narkotik sərxoşluğu vəziyyətində olarkən şəxsi mənzilinin qapısının açarından istifadə edərək nəqliyyat vasitələrini işə salmağa çalışıb.

Saxlanılan şəxs barəsində oğurluğa cəhd maddəsi ilə cinayət işi başlanıb, araşdırma aparılır. (lent.az)