Avtomobilini “protiv” saxlayan sürücü piyada keçidini zəbt etdi - FOTO

Piyada keçidini saatlarla şəxsi parklanma ərazisi seçdi, üstəlik əks istiqamətdə saxlayaraq ikiqat qayda pozuntusu törətdi.
Avtosfer.az xəbər verir ki, xoşagəlməz hadisə Yasamal rayonunun Cəfər Cabbarlı 29 ilə Əbilov 59 küçələrinin kəsişməsində qeydə alınıb. Saytın əməkdaşı tərəfindən çəkilən fotodan aydın olduğu kimi “Hyundai” markalı, 77-KB-427 dövlət nömrə nişanlı avtomobil “Amber” otelin qarşısında yerləşən piyadaların hərəkəti üçün nəzərdə tutulmuş keçidi işğal edib. Dayanma-durma qaydalarından bixəbər olmağı seçən sürücü uzun müddət maşınını həmin ərazidə saxlayaraq yolu keçən insanların hərəkətinə mane yaradıb. İnzibati Xətalar Məcəlləsinin 346-cı maddəsini pozan sürücünün daha bir səhvə yol verərək avtomobilini “protiv” park etməsi də diqqətdən qaçmayıb. 

Nərmin Əkbər