Ayağını qaldıran sürücü və sərnişinlər mütləq oxusun - Bel sına bilər - VİDEO

Son aylarda polisin dəfələrlə ayağı çöldə gedən sürücüləri cərimələdiyinin şahidi olmuşuq. Bəlkə də cərimə olunan şəxs narazı qala bilər. Amma tam əminəm ki, polis həmin vətəndaşı ölümdən və ya mümkün əlillikdən qoruyub. Necə?

Avtosfer.az-ın xəbərinə görə, İsveçrə Səyahət Klubunun sifarişi ilə maraqlı bir kraş test keçirilib. Sınaqda sərnişin qismində çıxış edən manekkenin ayaqları konsolun (qabaq panelin) üstünə yerləşdirilib. 60 km/saat sürətdə aparılan testin nəticəsi gözlənildiyi kimi olub. 300 km/saat sürətlə açılan hava yastığı sərnişinin ayaqlarını başına çırpıb. İlk zərbədə maneken omba nahiyəsindən ikiyə bölünüb, baş ağır travma alıb. Belə bir qəzadan sağ çıxma ehtimalı sıfıra bərabərdir (videoda 00.54-cü saniyədən sonraya diqqət edin).
Bu gün ayağı alın şüşəsində və ya pəncərədən kənarda hərəkət edən sərnişin və sürücülərimiz az deyil. Bu hərəkət tərbiyəsizlik olmaqla yanaşı, həyati təhlükəlidir. 
Bu cür qayda pozuntularını çəkib yayan vətəndaşı və ya faktı sənədləşdirib cərimə yazan polisi söymək yox, təqdir etmək lazımdır. Onlar ən azından kimisə təhlükəli işdən çəkindiriblər.

Vüqar Yaşaroğlu