Dayanma-durmanı qadağan edən nişan olmasa belə bu yerdə cərimələnə bilərsiniz - VİDEO

Sürücülərin ən çox pozduğu qaydalardan biri də dayanma-durma qaydalarıdır. Cəriməsi az miqdarda olsa da, törədilən pozuntu sıxlığa, tıxaca və hətta qəzaya səbəb ola bilir. Qaydalardan xəbərsiz olan sürücülər bəzən elə düşünür ki, dayanma-durma yalnız nişanla məhdudlaşdırılır. Lakin bu həmişə belə deyil. "Yol hərəkəti haqqında" Qanunun 52-ci maddəsində dayanma-durmanın hansı hallarda qadağan olunduğu aydın şəkildə qeyd olunub. Bunlardan biri də yolayrıcına və ya kəsişmə yerlərinə 5 metrdən yaxın dayanmaqdır.
Paytaxtın Mikayıl Müşviq küçəsində qeydə alınan videogörüntüdə "Nissan" markalı avtomobil döngəyə 5 metrdən yaxın dayandığı üçün geriyə dönən avtomobil manevri başa çatdıra bilmir. Qanunda tələb olunan 5 metrlik məsafə məhz bu cür manevrlərin rahat şəkildə həyata keçirilməsi üçün nəzərdə tutulub. Qanunun bu tələbini pozan sürücülər 20 manat məbləğində cərimə oluna bilərlər.

Bir sürücü öz rahatlığını təmin etmək üçün qaydaları pozursa, düşünməlidir ki, yüzlərlə sürücü buna görə əziyyət çəkir.

Təbriz Yusubov