Qaydaları səhv öyrətdiyinə görə tənqid edilən təlimçidən daha bir BİABIRÇI SƏHV - VİDEO

Bir müddət öncə sosial şəbəkələrdə tənqid edilən sürücülük təlimçisinin daha bir görüntüsü yayılıb. Avtosfer.az">Avtosfer.az xəbər verir ki, sürücülüyü öyrənən şəxslərə qaydaları səhv öyrədən təlimçi bu dəfə tələbəyə dairəvi hərəkət təşkil edilmiş yolayrıcının keçilməsi qaydasını öyrədir. Babək prospektində "Maşın bazarı"nın qarşısındakı dairəyə yaxınlaşan təlimçi bildirir ki, dairəvi hərəkət təşkil edilmiş yolayrıcını bildirən nişanın nömrəsi 1.7-dir. Amma qanunda həmin nişanın nömrəsi 4.3-dür.
Təlimçi daha sonra bildirir ki, dairəyə daxil olan zaman sola dönmə işığı yandırılmalı və sonra söndürülməlidir. Dairə boyunca hərəkət edəcəksənsə yenə də sola dönmə işığı yanılı qalmalıdır- deyə tələbəyə qaydaları səhv öyrədib.

Xatırladaq ki, "Yol hərəkəti haqqında" qanunun 42-ci maddəsinə görə dairəvi hərəkət təşkil edilmiş yolayrıcına daxil olarkən dönmə işığı sola yox, sağa yandırılmalı və dairə boyunca hərəkətdə olarkən heç bir dönmə işığı yandırılmamalıdır. Dairəni tərk edərkən isə mütləq sağa dönmə işığı yandırılmalıdır.

Onu da qeyd edək ki, dairə boyunca hərəkət edərkən dönmə işığı yalnız dairənin daxilindəki zolaqları dəyişərkən müvafiq istiqamətdə sağa və sola dönmə işıqları yandırılmalıdır. Yəni dairə boyunca hərəkət edən zaman sürücü zolağı dəyişmirsə heç bir dönmə işığı yandırılmamalıdır.

Təbriz