Sürət həddini aşmayan sürücü YPX maşınındakı radara düşdü - VİDEO

Sabirabad rayonu ərazisində sürət həddini aşmadan hərəkət edən sürücünün avtomobili radara düşüb. Avtosfer.az xəbər verir ki, bu barədə sürücü Yusif Abdullayev redaksiyamızın elektron ünvanına şikayət ünvanlayıb. O bildirir ki, idarə etdiyi 99-OV-563 qeydiyyat nişanlı “Opel” markalı avtomobillə  fevralın 14-də Sabirabad rayonu ərazisində sürət həddini aşmadan hərəkət edərkən, YPX avtomobilindəki radara düşüb: “Videogörüntüdən də aydın şəkildə görünür ki, yolun sağında 50 nişanı, ardınca isə Qaratəpə yaşayış məntəqəsini bildirən 5.22 nişanı quraşdırılıb. Həmin nişan əvvəlki sürət rejimini ləğv etdiyindən, mən 60 km/saat sürətlə hərəkət etməyə başladım. Lakin qarşıdan gələn YPX avtomobilindəki radar yoldakı sürət həddini 50 km/saat sürət müəyyən etdiyi üçün mənim barəmdə protokol tərtib edib”.

“Yol hərəkəti haqqında” qanunun 64-cü maddəsinin VII hissəsində qeyd olunub ki, 5.22 nişanı ilə işarələnən yaşayış məntəqəsindən qabaqda qurulmuş 3.24 nişanı həmin nişana qədər qüvvədə olur. Qanunun bu müddəsına görə, sürücü barəsində tərtib edilmiş həmin qərar həqiqətən də əsassızdır.

Sürücü Y.Abdullayev bu məsələ ilə bağlı Baş Dövlət Yol Polisi İdarəsinə şikayət ünvanladığını, lakin heç bir reaksiya verilmədiyini bildirir.

Baş Dövlət Yol Polisi İdarəsindən verilən məlumata görə, hazırda məsələ araşdırılır, nəticəsi barədə sürücüyə rəsmi məlumat veriləcək.

Leyla