Sürücülərə qanunsuz yazılmış protokollara hakim qanuni "don" geyindirdi - FOTO

Bakıda dayanma-durma qadağan olunmayan yolda haqsız cərimələnən sürücü məhkəməyə müraciət edib. Avtosfer.az-a məlumat verən oxucu iddia edir ki, məhkəmənin işə baxan hakimi Vüsal Qurbanov onun müraciətini əsassız hesab edərək qərarı qüvvədə saxlayıb. Sürücü protokol tərtib edilən yolda dayanma-durmanı qadağan edən nişanın olmadığını hakimə bildirsə də, onun bu sübutu əsassız hesab edilib.

Qeyd edək ki, dayanma-durma qadağan olunmayan yerdə avtomobili bucaq altında saxlayaraq parklanma qaydasını pozan sürücü 20 manat deyil, 10 manat miqdarında cərimə edilə bilər.

***10 dekabr

Bakıda dayanma-durma qadağan olunmayan yerdə cərimələnən sürücü Avtosfer.az-ın qaynar xəttinə şikayət ünvanlayıb. Sürücünün sözlərinə görə protokol noyabrın 25-də paytaxtın Təbriz küçəsi ilə Nemət Quliyev küçəsinin kəsişməsində tərtib edilib: “Həmin yerdə dayanma-durmanı qadağan edən heç bir nişan yoxdur. Əsas məsələ odur ki, mən maşını səkiyə paralel saxlamalı idim. Lakin bucaq altında park etdiyimə görə 20 manat deyil, 10 manat cərimə yazılmalı idi. Qeyd edim ki, həmin vaxt mənim maşınımdan başqa 40-a yaxın maşın bucaq altında park edilmişdi. Onların da hamısına cərimə artıq yazılıb”.

Qeyd edək ki, “Yol hərəkəti haqqında” qanunda 53-cü maddəsinin pozulmasına görə İnzibati Xətalar Məcəlləsinin 346-1.2-ci maddəsi ilə (nəqliyyat vasitəsinin qanunla müəyyən edilmiş parklanma üsulunu pozmaqla parklanmasına görə) on manat məbləğində cərimə nəzərdə tutulub.

Məsələ ilə bağlı Bakı Nəqliyyat Agentliyinə verdiyimiz sorğu cavabsız qaldı...

Fərid