Yazda sürücülər buna görə cərimələnir və qəzaya düşürlər - VİDEO

Yaz gəlib, ağaclar yarpaqlayır, bu nə qədər gözəl olsa da, sürücülər üçün bir o qədər də problemlər yaradır.

Avtosfer.az xəbər verir ki, bəzi yol nişanları yolun kənarında yerləşən ağacların arasında “gizlənib” sürücülərə çətin anlar yaşadır. Bəzi sürücülər nişanları görmədiyindən qaydaları pozur və cərimə olunduqda isə haqqlı şəkildə narazılıq edirlər.

Dövlət Ekoloji Ekspertiza Agentliyinin İdarə Heyətinin sədri Mirsalam Qənbərov məsələ ilə bağlı saytımıza açıqlamasında bildirib ki, belə olduğu halda, ağacların budanılması üçün Agentlikdən icazə almağa ehtiyac yoxdur. DYP bununla bağlı Bakı şəhəri İcra Hakimiyyətinin Yaşıllaşdırma Təsərüfatı Birliyinə müraciət etməli və həmin qurum tərəfindən ağacların budanılması təmin olunmalıdır.

Mirsalam Qənbərov: “Fiziki görüntüyə mane olan, təhlükə yaradan, sınma riski olan və ağırlıq yaradan ağacların budanılması vacibdir. Bu həm də ağacların cavanlaşması üçün lazımlı addımlardan biridir”

Bakı şəhəri Dövlət Yol Polisi İdarəsinin baş inspektoru polis mayoru Araz Əsgərli isə bildirib ki, sözügedən mövzu ilə əlaqədar ərazidə xidmət aparan Yol Patrul Xidməti əməkdaşları yol nişanları, işıqfor obyektləri ilə bağlı hər hansısa bir çatışmamazlıq məlumatlarını toplayaraq mərkəzə bildirir və bu cür məsələlər də həllini tapmaq üçün aidiyyəti qurumlara göndərilir.

Araz Əsgərli: “Yaşıllq hissənin yol nişanının, işıqforun üzərini tutması və daha sonra həmin ağacın budanılması ilə bağlı lazımi tədbirlərin görülməsi, bu işləri həyata keçirdən aidiyyəti qurumlara məlumat formasında göndərilir.”

Qeyd edək ki, belə hallarla qarşılaşan sürücülər Yol Patrul Xidməti əməkdaşlarına və ya Avtosfer.az-ın qaynar xəttinə məlumat verə bilərlər.

Nurlan Sakitoğlu
Nərmin Əkbər