458 nəfərin olduğu gəmi batdı - Sərnişinlərin qışqırıqları eşidilir

Çinin cənubunda 50-80 yaş arası 458 nəfəri daşıyan gəmi fırtınaya düşərək batıb. “Qafqazinfo” xarici KİV-ə istinadən xəbər verir ki, xilasedicilər cəmi 12 nəfərin həyatını qurtara biliblər, 400-dən çox sərnişindən isə heç bir xəbər yoxdur. Gəminin içərisində qalan sərnişinlərin yardım qışqırıqları eşidilir. 

Xilasetmə tədbirləri külək və güclü yağış səbəbindən çətinləşib. İndiyə kimi xilas edilənlər arasında gəminin kapitanı və baş mühəndisinin olduğu bildirilir. Çinin dövlət radiosu gəminin iki dəqiqə ərzində batdığını və yardım siqnalı vermədiyini, gəmidə olan 7 sərnişinin sahilə üzərək xəbəri çatdırdığını deyib. Çinin baş naziri axtarış və xilasetmə tədbirlərinə nəzarət etmək üçün hadisə yerinə gəlib. Batan gəmidə yaxınları olanlar isə turu təşkil edən şirkətin Şanxaydakı ofisinə basqın ediblər. Xilasedicilər gəminin üzərinə cəkiclə vuraraq sağ qalanların olduğu yeri müəyyən etməyə çalışırlar.