Ağdamda «Toyota» ilə «07» toqquşdu - FOTO

Ağdamın Əfətli kənd sakini Rais Həsənovun idarə etdiyi «Toyota» markalı avtomobil rayonun Evoğlu kənd sakini Ayaz Həsənovun sükanı arxasında əyləşdiyi «VAZ-2107»nin yoluna çıxıb. Toqquşma nəticəsində «07» yoldan kənara çıxıb. Avtomobilin sürücüsü Ayaz Həsənov yaralanıb. «Toyota»nın təhlükəsizlik yastıqlarının açılması isə Rais Həsənovu xəsarət almaqdan saxlayıb.

«VAZ 2107»nin sürücüsü 39 aşlı Ayaz Həsənov əvvəl Ağdam Mərkəzi Rayon Xəstəxanasına aparılsa da, vəziyyəti ağır olduğundan Bərdəyə göndərilib.

Bərdə rayon xəstəxanasından əldə etdiyimiz məlumata görə, zərbə nəticəsində Ayaz Həsənovun sol ayağı sınıb, sol əli və döş qəfəsi əzilib. Yaralıya tibbi yardım göstərilib, hazırda onun vəziyyəti orta ağır qiymətləndirilir. 

Ağdam rayon Polis Şöbəsinin Dövlət Yol Polisi Bölməsindən hadisədə təqsirli tərəfin «Toyota»nın sürücüsü Rais Həsənov olduğunu təsdiqlədilər. 

Hazırda faktla bağlı araşdırma aparılır.