Ara məsafəsini qorumayan sürücü qəza törətdi

Gecə saatlarında Bakının Xətai rayonunda yol nəqliyyat hadisəsi baş verib. Nobel prospektində qeydə alınmış avtoqəza zamanı “Toyota” və “Mercedes” markalı avtomobillər toquşub. Müəyyən edilib ki, hər iki nəqliyyat vasitəsi şəhərin mərkəzindən Zığ şossesi istiqamətində hərəkət edirmiş. “Mercedes” markalı minik maşını Nobel prospekti ilə Süleyman Əhmədov küçəsinin kəsişməsində işıqforun qırmızı işığının tələbilə dayanıb. Ancaq digər avtomobilin sürücüsü ara məsafəsini düzgün təyin edə bilmədiyi üçün onun idarə etdiyi “ToyotA” markalı minik maşını zərblə arxadan “Mercedes”ə çırpılıb. Hadisə nəticəsində ikinci minik maşınının sürücüsü yüngül xəsarət alıb. Ona hadisə yerinə çağırılmış Təcili Tibbi Yardım briqadasının həkimləri tibbi yardım göstərib. Qəzada ziyan görmüş nəqliyyat vasitələri isə cərimə dayanacağına qoyulub. Yol qəzasının təfərrüatları araşdırılır.