Dəhşətli qəzada yaralananların həkimi danışdı - VİDEO

Qax rayon icra hakimiyyətinə məxsus “Qaz-31” markalı avtomabil Şəki ərazisindən Qax rayonu istiqamətinə gedərkən Gümrük çayı üzərindəki təxminən 8-10 metr hündürlüyü olan körpüdən aşıb. Nəticədə biri icra hakimiyyətinin əməkdaşı olmaqla iki nəfər dünyasını dəyişib. Avtomobildə olan digər üç nəfər isə ağır yaralanıb. ANS-in məlumatına görə, Qax sakini Azər Qazaxov avtomobillə qəfildən idarəetməni itirərək yolun sağına çıxıb və maşın körpüdən aşıb. Hadisə nəticəsində iki nəfər Şahid Əhmədov və Vüqar Paşayev elə yerindəcə dünyasını dəyişib. Üç nəfər isə müxtəlif dərəcəli bədən xəsarətləri alıb. Dünyasını dəyişənlərdən Şahid Əhmədov Qax icra hakimiyyətinin əməkdaşı olub. Qəzada yaralananlar Qax Rayon Mərkəzi Xəstəxanasına çatdırılıb. Həkimlər hər üç yaralının vəziyyətinin ağır olduğunu bildirir. “Üç nəfər müxtəlif dərəcəli bədən xəsarətləri ilə xəstəxanaya daxil olub. Hazırda yaralılar həkim nəzarəti altındadır. Onların sağlıq durumu orta stabildir”, – deyə həkim bildirib.

Hadisə ilə bağlı Qax Rayon Rokurorluğunda araşdırma aparılır.