Evakuator maşını "İnfiniti" ilə toqquşdu: yaralılar var

Tovuzda qeyri-adi qəza baş verib. Bu dəfə evakuator avtomobillə toqquşub. Avtosfer.az regiontv-yə istinadən xəbər verir ki, hadisə gecə saatlarında Bakı-Qazax avtomagistralının Qovlar qəsəbəsi ərazisində qeydə alınıb. 2 nəfərin xəsarət aldığı qəza zamanı evakuator xidməti göstərən avtomaşın "İnfiniti" markalı avtomobillə toqquşub. Hər zaman qəzaya düşən avtomobilləri daşıyan minik vasitəsi bu dəfə özü hadisə iştirakçısı olub.

Toqquşma o qədər şiddətli olub ki, "İnfiniti"də olan sərnişinlər, 20 yaşlı Rəmzi Alıyev və 25 yaşlı Əsmər Tanırverdiyeva müxtəlif dərəcəli bədən xəsarətləri alaraq Tovuz Mərkəzi Rayon Xəstəxanasına çatdırılıblar.

Xəstəxanadan verilən məlumata görə, Rəmzi Əliyev ilkin yardım göstərildikdən sonra evə buraxılsa da, avtomobildə olan digər sərnişin ağır xəsarətlər aldığından tibb ocağında müalicəsi davam etdirilir. Həkimlər 25 yaşlı Əsmər Tanrıverdiyevanın vəziyyətini kafi qiymətləndirirlər.

Faktla bağlı BDYP-nin əməkdaşları araşdırma aparır.