Qobustanda "Hyundai" yoldan çıxıb aşdı; sürücünün anası ÖLDÜ; 2 YARALI VAR - FOTO

Bu gün saat 15 radələrində Bakı-Şamaxı avtomobil yolunun Qobustan rayonunun ərazisindən keçən hissəsində “Hyundai Sonata” markalı avtomobil idarəetmədən çıxaraq aşıb.

DİN-in Mətbuat Xidmətinin regional qrupundan Avtosfer.az-a bildirilib ki, avtomobildə olan sərnişinlərdən biri - 1971 təvəllüd Mahmudova Ramidə ölüb. Həmçinin sürücü, 32 yaşlı Əli Mahmudov və daha bir sərnişin isə xəsarət alıb. Qeyd edək ki, qəza zamanı dünyasını dəyişən şəxs sürücünün anasıdır.

Ölüm və xəsarətlərlə nəticələnən yol-nəqliyyat hadisəsi ilə bağlı cinayət işi başlanılıb, araşdırmalar davam etdirilir.

Baş Dövlət Yol Polisi İdarəsinin (BDYPİ) rəsmisi, polis polkovnik-leytenantı Mübariz Ağayev Avtosfer.az-a bildirib ki, ilkin ehtimala görə, hadisənin baş verməsinə səbəb yüksək sürət və sürücü diqqətsizliyi olub. DYP sürücülərdən bir daha yollardakı sürət həddinə əməl etməyi, özlərinin və yaxınlarının həyatını təhlükəyə atmamağı tələb edir.