Taksi sürücüsü qəza törətdi: 1 ölü, 1 yaralı

Şəmkirdə bir nəfərin ölümü, bir nəfərin yaralanması ilə nəticələnən yol nəqliyyat qəzası baş verib. Avtosfer.az-ın APA-ya istinadən verdiyi məlumata görə, hadisə rayonun Çənlibel kəndinə gedən yolda qeydə alınıb. Rayonun Ələsgərli kənd sakini, 1970-ci il təvəllüdlü Şəmşir Xəlilov idarə etdiyi “VAZ 2107” markalı avtomobillə hərəkətdə olarkən eyni istiqamətdə gedən “VAZ 2106” markalı avtomobilə çırpılıb. Qəza nəticəsində sürücü Ş.Xəlilov və maşında olan sərnişin Çənlibel kənd sakini, 1959-cu il təvəllüdlü Fizuli Novruzov ağır bədən xəsarətləri alaraq Şəmkir Mərkəzi rayon xəstəxanasına yerləşdirilib. Həkimlərin səyinə baxmayaraq F.Novruzovun həyatının qurtarmaq mümkün olmayıb, o dünyasını dəyişib.

Məlumata görə Ş. Xəlilov “VAZ 2107” markalı avtomobillə taksi fəaliyyəti ilə məşğul olurmuş. O, F.Novruzovu evinə aparanda qəza törədib.

Faktla bağlı Şəmkir rayon Polis Şöbəsində araşdırma aparılır.