Tovuzda qəza: mikroavtobus parçalandı

Tovuzda ağır yol qəzası baş verib. Tovuzdan Qazax istiqamətinə hərəkət edən "Ford" markalı sərnişin avtobusunun sürücüsü, Ağstafa rayonu, Aşağı Göycəli kənd sakini, 36 yaşlı Cəmil Əsgərov rayonun Düz Cırdaxan kəndi ərazisində dönmə əməliyyatını yerinə yetirə bilməyərək avtomobili yol kənarındakı betonlara çırpıb. Güclü zərbənin təsirindən "Ford" hissələrə ayrılıb.

Avtosfer.az regiontv-yə istinadən xəbər verir ki, hadisə zamanı mikroavtobusda sərnişin olmadığından yalnız sürücü ağır xəsarət alıb. Avtomobildə sıxılmış vəziyyətdə qalan Cəmil Həsənovu hadisə yerinə çağırılan yanğınsöndürən-xilasedicilər çıxarıblar.

Tovuz Mərkəzi Rayon Xəstəxanasına yerləşdirilən yaralının vəziyyətinin ağır olduğu bildirilir. Baş verən hadisə ilə bağlı araşdırmalara başlanılıb.