Toydan qayıdan sərxoş sürücü qəzada öldü

Bakıda toydan qayıdan sərxoş sürücü avtomobil qəzasında ölüb. Avtosfer.az “report”a istinadən xəbər verir ki, hadisə Xəzər rayonunun Qala qəsəbəsindən Xaşaxuna bağları adlanan əraziyə gedən yolda baş verib. Belə ki, “VAZ 2107” markalı avtomobillə hərəkət edən sürücü - 1992-ci il təvəllüdlü Cavid Şahlarov idarəetməni itirib. Nəticədə sürücü avtomobili yol kənarındakı işıq dirəyinə vurub. Xəsarət alan sürücü və maşında olan sərnişin - 23 yaşlı Babayev Fərman Rasim oğlu ağır vəziyyətdə xəstəxanaya yerləşdirilib. Həkimlərin səyinə baxmayaraq, sürücü Cavid Şahlarovun həyatını xilas etmək mümkün olmayıb. O, xəstəxanada ölüb. Faktla bağlı Xəzər Rayon Polis İdarəsində araşdırma aparılır.

Qeyd edək ki, hadisə sürücü C.Şahlarov və xəsarət alan F.Babayev toydan qayıdan vaxt baş verib. Onların hər ikisi qəza anında sərxoş vəziyyətdə olub.