Yunanıstan sahillərində qəza - 78 nəfər öldü

Yunanıstan sahillərində miqrantları daşıyan gəmi qəzaya uğrayıb.

Avtosfer.az xəbər verir ki, bu barədə "Reuters" agentliyi Yunanıstan Sahil Mühafizəsinin məlumatına istinadən məlumat yayıb.

Bildirilir ki, qəza nəticəsində azı 78 nəfər ölüb. Gəminin 100-dən çox sərnişini xilas edilib. Sağ qalanlar Kalamata şəhərinə aparılıb.

Müxtəlif mənbələrə görə, gəmidə 400-700 arası insan olub. Peloponnes periferiyası administrasiyasının mətbuat xidməti ölənlərin sayının əhəmiyyətli dərəcədə artacağını istisna etmir.

KİV gəmidəki sərnişinlərin əksəriyyətinin Əfqanıstan, Suriya, Misir və Pakistandan olan kişilər olduğunu yazır. Onlar Liviyadan İtaliyaya gedirmişlər.

BMT-nin məlumatına görə, ilin əvvəlindən Aralıq dənizi vasitəsilə Avropaya 72 mindən çox miqrant gəlib. Eyni zamanda, qəzalar zamanı minə yaxın insan həlak olub və ya itkin düşüb.

Modern.az