Günəş enerjisi ilə işləyən elektrikli velosiped təqdim olundu

Çinin yeni elektrikli velosiped istehsalçısı “Phosgo” günəş panelləri ilə təchiz edilmiş və süni intellekt funksiyalarına malik "Go5 Ultra Solar Bike" adlı velosiped modelini təqdim edib. Avtosfer.az "Bizim.Media"ya istinadla xəbər verir ki, şirkət onu "dünyanın ilk süni intellekt dəstəkli günəş enerjisi ilə özünü dolduran elektrikli velosipedi" adlandırır.

Şirkətin məlumatına görə, velosipedin təkərlərinə inteqrasiya olunmuş günəş panelləri hər gün təxminən 27 kilometr əlavə enerji toplaya bilir. Bu isə gündəlik ümumi gediş məsafəsini 193 kilometrə çatdırır. Normal istifadə zamanı batareyanın 30 günə qədər şəbəkədən enerji doldurulmadan işləyə biləcəyi iddia edilir.

Velosipedə səsli süni intellekt köməkçisi də əlavə olunub. İstifadəçilər səs əmrləri ilə naviqasiya, hava proqnozu, yaxınlıqdakı obyektlərin axtarışı və digər funksiyalardan istifadə edə biləcəklər.

ABŞ bazarı üçün model 750 vattlıq mühərriklə və saatda 45 kilometrədək, Avropa bazarı üçün isə qanunvericiliyə uyğun 250 vattlıq mühərriklə və saatda 25 kilometrədək sürət dəstəyi ilə satışa çıxarılacaq.

Velosipedin "Kickstarter" platformasında kampaniyasına 27 iyulda start veriləcək. İlkin sifariş qiymətinin 1499 ABŞ dollarından başlayacağı açıqlanıb.